MASALIGON si Filipino martial arts veteran ug two-time ONE lightweight world champion Eduard “Landslide” Folayang nga aduna pa siya’y saktong ikabuga aron makalangkat pagbalik og world title posible karong tuiga.
Nabuhian ni Folayang ang iyang world lightweight title pinaagi sa 1st round submission nga kapildihan batok sa iyang higpit nga karibal nga si Shinya Aoki sa ONE: A New Era in Tokyo sa sayong bahin sa miaging tuig.
Sakit alang kang Folayang ang maong kapildihan apan wala kini nakapaubos sa iyang moral.
Karong tuiga, gipasalig ni Folayang nga mas mokayod siya’g insakto sa training aron makabangon gikan sa pagkapandol.
Gipasabot ni Folayang nga aduna siya’y mga leksyon nga nakat-unan sa iyang kapildihan batok kang Aoki ug iyang kining magamit alang sa sunod niyang tahas.
Human sa iyang kapildihan batok kang Aoki, si Folayang naka-challenge kang multiple-time lightweight champion Eddie “The Underground King” Alvarez.
Gidominar unta ni Folayang si Alvarez sa sayong bahin sa 1st round apan nakahigayon si Alvarez sa pagmugna og rear-naked choke nga kadaugan sa ulahing bahin sa round.
Lain kining masakit nga kapildihan alang kang Folayang apan wala gihapon siya mawad-i og paglaom.
Sa premiro niyang tahas karong tuiga, si Folayang makigbatok kang Ahmed “The Wolverine” Mujtaba sa Pakistan karong Enero 31 sa ONE: Fire & Fury sa Mall of Asia Arena. (ESL)