POSIBLENG manubag ang mga operator nga nibabag sa mga modernong sakyanan atol sa pag-test drive sa kadalanan sa siyudad sa Cagayan de Oro.
Adunay report nga gibabagan ang pagbiyahe sa mga Orotsco jeep rason nga ila kining gireklamo.
Sa pakighinabi kang Konsehal Teodulfo Bong Lao, tsirman sa Trade and Commerce gibutyag niini nga angayang manubag sa balaod ang mga nibabag niining maong programa sa gobyerno.
“Legal man na ilang operation sa mga modern nga public utility jeepney so kung giharangan lugar to bale manubag pud sila in accordance sa unsay existing nato nga balaod,” matud ni Lao.
Gidugang pa niini nga kini pagtuman usab sa programa sa national government ug dili kini pwedi babagan.
Samtang nibutyag usab si Amenoden Guro, Regional Director sa Land Transportation and Regulatory Board (LTFRB) nga katungod ni bisan kinsa mga magpagawas sa ilang mga mulo apan dili usab maayong babagan ang igo lang pag-implementar sa kamandoan sa gobyerno nga alang sa kaayohan sa tanan.
Giingong kung mapatud-an ang mga nibabag nga mga operator posibleng dili kini makaapil sa nahisgutang programa.
“Well ang sanction unang una nga mapamatud-an nga sila nanag-iya og usa ka public utility vehicle o jeep diha sa Bugo so dunay tendency nga dili sila makaapil aning programa sa atong gobyerno pag modernized sa atong public utility vehicle,” dugang pa.
Nasayran nga tumong sa maong buhatan nga ipatuman na ang modernization program karong tuig 2020.