TANAN nga mga kawani sa City of Talisay Traffic Operations Development Authority (CT-TODA) ang wala gitugutan nga maka-day off o leave ning Dominggo, Enero 19 atol sa Sinulog.
Motabang sila og dumala sa trapiko gikan sa buntag hangtud na sa alas 10 sa gabii.
Gani ang matag usa kanila ang motrabaho siyam ka oras, imbes nga sa normal nga dutyhan nga walo ka oras.
Gipasabot ni Jonathan Tumulak ang pangulo aa CT-TODA nga agi kini og tabang ug sakripisyo halad alang sa balaang Senior Sto. Niño.
Iyang gitug-an nga nagkasabot sila sa Cebu City Transportation Office (CCTO) nga mo-augment ang CT-TODA personnel ilabi na sa gabii.
“Amo na gud na napanlatawan nga posible gyud mohuot ang trapiko sa buntag, kadtong gikan sa habagatan nga gusto mosakisi sa Sinulog ug sa mga deboto sa Sr. Sto. Niño, ug ilabi na sa gabii atol sapagpanguli nakita nato sauna nga grabe ang bul-og sa mga tawo ug sakyanan nga manguliay,” matod ni Tumulak.
Si Tumulak kinsa kanhi nangulo usab sa CCTO, nitug-an nga usa gyud sa ilang problema sauna nag trapiko diha sa Cebu City south, ilabi na kon wala nay traffic personnel sa Talisay nga mag-man sa kadalanan sa habig sa Talisay.
Hinungdan nga usa usab sa nasabutan sa CT-TODA ug CCTO nga kon gikinahanglan, motabang diha sa kadalanan sugod sa barangay Pardo Cebu City ang taga CT-TODA.
“Kana kon mahitabo na gani nga ma-busy na halos tanan personnel sa CCTO sa pagmman sa trapiko sa ubang bahin sa Cebu City, mo-augment mi nila,” dugang ni Tumulak.
Ang maong plano ang gihatagan na usab og pagtugot ni Talisay City Mayor Gerald Anthony Gullas.
Agig tabang nga dili mohuot ang trapiko sa dakbayan sa Sugbol sa Sinulog grand parade, no left turn policy sa dan N. Bacalso sa habig sa Talisay magpadayon. (FMD)