NAGKATIBULAAG ang mga tawo sulod sa barangay hall dihang usa ka lalaki ang nanghadlok pinaagi sa pagbahad og granada niadtong adlawng Martes sa alas 10:30 sa Enero 14, 2020 sa Purok 5, Barangay C- Handumanan, Quezon, Bukidnon.
Si Police Major Mitchel Clemencio, hepe sa Quezon Police Station niingon nga humana og husay ang kapitan niadtong tungora tali sa mag-agaw nga sila si Maricel P. Arigo, 43 ug Buenaventura P. Arigo, 55, minyo, usa ka mag-uuma.
Matud ni Major Clemencio sa Sun.Star Superbalita nga humana og husay ang duha ka parte human si Apolinario nagreklamo batok ni Buenaventura nga nangukod kanila og sundang hinungdan ila kining gipatawag sa barangay.
Humana ang husay niadtong tungora ug gani nagpinirmahay na apan kalit mitindog si Buenaventura nga nagbahad "naay mananap akong pamatyon," hinungdan nagkatibulaag ang mga tawo sulod sa barangay ug nanion pa kini og kalibre 38.
Miresponde ang kapolisan ug deretsong nasikop sa hot pursuit operation ang suspek.
Matud ni Clemencio nga adunay frustration ang suspek ug dali lang masuko basi sa pamahayag sa mga silingan. Gisuta pa nila karon diin nakuha ang pistola ug granada nganong gahupot kini.
Kasong kasupakan sa paghupot sa ginadili nga armas ang ekplosibo, ug frustrated murder atubangon niini karon panahona.