IPATAWAG sa tsirman sa komitiba sa Trade and Commerce ang mga hingtungdan nga ahensiya human nakadawat og reklamo kalabot na sa 'overpricing' sa mga tambal sulod sa mga balay tambalanan.
Gibutyag ni Konsehal George Goking, tsirman sa Trade and Commerce nga buot niining makigtagbo sa Department Of Health (DOH), Department of Trade and Industry, Food and Drug Administration (FDA) ug mga parmasiya kalabot na sa hisgutanan nga mas mahal ang ilang mga tambal sulod sa ospital.
"So ang presyo sa pharmacy inside the hospital mas dako sa outside, in short masakyan gyud nila ang presyo," matud ni Goking.
Buot niini nga pa-imbestigahan ug magbutang gyud og presyo nga kaya sa katawhan.
"Investigate and we will come up with suggested retail price, presyo nga affordable sa tao," dugang niini.
Gitakdang ipatawag niini ang nahisgutang mga ahensiya ug hisgutan diha sa iyang komitiba aron matubag ug mahatagan og katin-awan ang maong reklamo.