LAING lalaki na usab ang gituohang nagpakamatay tungod sa depresiyon niadtong nilabay nga adlaw sa Zone-3, Barangay Mambuaya ning siyudad sa Cagayan de Oro City.
Patay si Virgilio Centro, 37, dunay kaipon ug residente sa nahisgutang dapit.
Sa impormasiyon gikan sa Cagayan de Oro Police Office (Cocpo) nga subay sa inahan ni Centro nga nakita nalang ang anak nga nagbitay ilawom sa punoan sa nangka gamit ang nylon nga pisi.
Dali pa kining gidala sa J.R Borja General Hospital apan dead on arrival na.
Gibutyag usab sa inahan nga dunay depresiyon ang anak nga niresulta sa maong hitabo.
Kahinumdoman nga hugot ang kampanya sa lokal nga kagamhanan sa siyudad labi na sa City Social Welfare and Development (CSWD) labi na sa Psychosocial division sa pagpangulo ni Jaymee Leonen, resident psychologist kalabot na sa mental health program ug nagpahinumdom nga ang depresiyon usa ka sakit nga angayang matambalan.
Gi-aghat usab niini ang mga nakasinati og depresiyon nga andam sila nga motabang sa mga nakasinati niini pinaagi sa pagdangop sa ilang buhatan, pagpadala og mensahe sa ilang Facebook page nga CSWD CDO Psychosocial o motawag sa 911 aron matabangan.