WALAY nakitang rason ang tsirman sa komitiba sa Trade and Commerce nga maghatag pa og lugway sa mga negosyante nga dili mag-renew sa gihatag nga panahon sa lokal nga kagamhanan sa siyudad sa Cagayan de Oro.
Nasayran nga kutob nalang karong Enero 20 ang gitagana sa mga negosyante nga maka-renew sa ilang mga business permit.
Gibutyag ni Konsehal George Goking, tsirman sa Trade and Commerce nga tulo na ka tuig nga sige og hatag og lugway alang kaniya dili na niini i-endorso ang lugway sa pag-renew og business permit.
Giingong gihatagan na og panahon ang mga taxpayer sa pagbayad gikan sa Lunes hangtod Biyernes alas 8:00 sa buntag hangtod alas 7:00 sa gabii ug Sabado ug Dominggo alas 8:00 hangtod alas 5:00 sa hapon.
"So unsa man rason? Ang rason nga makapa-extend kung naay calamity so we have given enough time, we have other things to do, dili na," matud ni Goking.
Gidugang pa niini nga sobra na kung maghatag pa og lugway.
"For me I will not endorse for extension, sakto na it's too much," dugang pa.
Kahinumdoman nga niadtong Enero 13 anaa na sa P69 milyones ang nakolekta sugod Enero 2 tuig 2020.