BALHOG sa prisuhan ang usa ka lalaki human sapon nagsigarilyo og marijuana sulod sa mall mga alas 1:00 sa hapon niadtong Enero 14 sa Macapagal Avenue, Tubod, siyudad sa Iligan.
Giila ang dinakpan nga mao si Mohammad Sannie P. Jamel, 25, taga Marawi City.
Si Police Major Abogado Mautin Jr., hepe sa Iligan City Police Station, niingon nga mitawag kanila ang security personnel sa wala na ginganlan nga patigayon ug nangayo og tabang.
Kini human namatikdan ang suspek nga nagsigarilyo gamit ang marijuana sulod sa cubicle sa lalaki nga pansayan nga nahimutang sa 3rd floor.
Sa pagkasapon niini kumpirmadong nasakmit gikan sa posisyon ang mga uga nga dahon sa marijuana nga gisulod sa dayag nga cellophane. Kini dunay street value nga P600.
Sa pagkakaron ang suspetsado detinado na sa prisuhan kinsa gitakdang mag atubang og kasong RA 9165 kon Dangerous Drugs Act.
Mga nakumpiskang pakete gidala na sa PNP crime laboratory alang sa masusing eksaminasyon.