SUPERBALITA DAVAO

Estudyante gipatay

(Hulagway kuha ni Dexter T. Visitacion)

BLANGKO pa ang kapulisan sa posibleng motibong nagpaluyo sa kamatayon sa estudyante nga gipusil didto sa purok 3, crossing gabi, brgy. Poblacion, Compostela, Davao de Oro alas 8:30 sa gabii, Enero 14, 2020.

Ang biktima mao si Erick John Ramirez, 26, ulitawo, 3rd year student sa Compostela Valley State College ug molupyo sa nahisgutang dapit.

Ang inahan sa biktima nga si Jean Ramirez, 53, nagbutyag dihang personal nga nahinabi sa Superbalita nga niadtong higayona nangandam sila sa iyang anak alang sa salu-salo nga pagahimuon sa ilang balay sa pagkasunod adlaw, Enero 15, 2020, agi'g pagselebrar sa kapistahan ni Sr. Sto Nino.

Matud pa nga human natuman ang sugo sa inahan, ang biktima migawas ug mipahulay ug naglingkod sa giparking niyang motor gawas sa ilang balay.

Sumala pa nga dunay nakakita nga dunay wa mailhing lalaki nga miduol sa biktima samtang naglingkod sa giparadang motor ug wa madugay mipaka ang duha ka sunod-sunod nga buto sa pusil.

"Nagpahangin ra man to siya sa gawas sa among balay samtang ako nagtiwas sa among giandam alang sa salu-salo nga himuon pagkaugma agi'g pagselebrar sa kapistahan ni Sr. Sto. Nino," saysay sa inahan nga si Jean.

Matud pa nga adunay nakasaksi nga gawas sa mipusil sa biktima, dunay laing lalaki pa nga nagpahipi sa nakaparadang sakyanan ug maoy nagmaneho sa motorsiklo nga gisakyan sa lalaking mipusil kinsa nagdaling mipalayo paingon sa sentrong bahin sa lungsod.

Ang biktima nakahiagom og duha ka mga samad pinusilan sa lawas, usa sa walang kamot samtang laing usa sa ulo, nga miresulta sa hinanali niyang kamatayon.

Gibutyag nga ang biktima nag-inusarang anak ug usa ka matinahurong batan-on ug way nakaaway o nakabangi man lang, butang nga nakapalibog sa mga nakaila kaniya kung nganong gipatay siya.

Narekober sa mga miresponding pulis gikan sa crime scene ang duha ka mga basiyo sa bala sa kalibre .45 nga pistola ug usa ka balines nga milapos sa sulod sa balay sa biktima.

Patay'ng lawas sa biktima gipahiluna sa Funeraria De Alar sa Purok 2, Brgy. Poblacion.

Giingong kini maoy pinakaunang insidente sa pagpamusil patay nga natala sa kapulisan Compostela Municipal Police Station ning tuig 2020. (Dexter T. Visitacion)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph