GILAMAYAN karon sa iyang pamilya ug mga kabanay ang patay'ng lawas sa lalaki nga gipatay human nga giingong nanghikap og bilahan sa babaye samtang nagtagay didto sa Km 92, Purok 9, Brgy. Magsaysay, Nabunturan, Davao de Oro alas 7:45 sa gabii, Lunes, Enero 13.
Nailhan ang napatay nga si alyas Ron, 41, laborer, biyudo ug molupyo sa nahisgutang dapit.
Sa report nga nakuha gikan sa Davao De Oro Provincial Police Office, nasayran nga nakadawat og taho ang Nabunturan Municipal Police Station gikan kang Kagawad Diony C. Arranguez sa Brgy. Magsaysay nga nagpahibawo sa nahisgutang insidente.
Base sa gihimong pagpanubay sa kapulisan, nasayran nga ang biktima nakigtagay og inom, kauban sa iyang mga paryente.
Apan giingong atol sa ilang inom, nakita sa ginganlan og Alfonso Salacan, 60, way trabaho, minyo, nga gihikap ni alyas Ron ang pribadong parte sa lawas sa pag-umangkon sa nahiuna nga ginganlan lang og alyas Grace.
Tungod niini, niulbo ang kasuko ni Salacan ug iyang giluba si alyas Ron sa makadaghang higayon tumong sa nagkadaiyang bahin sa lawas.
Ang biktima gidali pagdala ngadto sa Comval Provincial Hospital sa lungsod sa Montevista pinaagi sa mga mirespondeng sakop sa Nabunturan Emergency Response Team (NERT) sa pamasin nga maluwas pa apan gideklarang dead on arrival na sa doktor nga naghiling niini.
Narekober gikan sa crime scene ang usa ka hunting knife nga gituohang maoy gigamit sa suspek sa pagpatay sa biktima.
Hinuon, nasikop sa mga miresponding pulis si Salacan ug anaa na sa kustodiya sa Nabunturan MPS ug pasakaan og tukmang kaso.