SURPRISANG gipahagsa sa Memphis Grizzlies ang Houston Rockets, 121-110, kagahapon sa nagpadayon nga National Basketball Association (NBA).
Ang rookie guard nga si Ja Morant maoy nahimong bangis sa Grizzliess pinaagi sa pagpahagsa og 26 puntos ug walo ka assists samtang midugang usab og 24 puntos sa kadaugan nga naghatag kanila sa ikawalong puwesto, 18-22.
Ang Houston nga may 26-12 nga baraha mius-os ngadto sa ikaupat nga puwesto.
Laing naghatag og labad sa ulo sa Rockets si Jonas Valanciunas nga may 19 puntos ug Jaren Jackson nga mitali og 15.
Nahimo sa biya nga Grizzlies ang pagbuntog sa Rockets taliwala sa 41 puntos nga nahipos ni James Harden. Wala moduwa ang backup niini nga si Russel Westbrook.
Nagtabla 95-95 sa nahabiling otso minutos sa duwa apan ang 11-1 nga rally sa Grizzlies nga giduslitan sa tagsatagsa ka tres ni Solomon Hill, Brooks ug Morant maoy nagwanang sa dalan sa Grizzlies, 106-96.
Giangkon ni Rockets coach Mike D’Antoni nga dunay gamayng kakuwang sa ilang duwa nga nakahatag og igong kahigayonan sa Memphis.
“There were little things,” ingon ni D’Antoni. “Most importantly, we couldn’t keep the Grizzlies in front of us. They finished very well at the rim on a lot of fast-break possessions. ... We didn’t do enough to stop them.”
Si Eric Gordon mipugnit og 23 puntos, timaan nga nabalikan na sa iyang pulso human sa taodtaod nga pagkapalyar niini.
Sa laing duwa, mipaulbo og season-high nga 43 puntos si Kawhi Leonard sulod lang sa tulo ka quarters aron ituboy ang Los Angeles Clippers, 128-103, batok sa Cleveland Cavaliers.
Matod pa sa Sportsradar, nga kadto maoy ikaduha sukad niadtong 1996 nga ang usa ka player sa Clippers mitali og labing minus 40 puntos sulod sa tulo ka quarters.
Si Lou Williams mipaksit og 40 puntos batok sa Golden State niadtong 2018.
Sa second quarter, si Leonard nakakolekta og 14 puntos nga gidayandayanan og upat ka tres sa dihang misugod na pag-arangkada ang Clippers.
Nakaduwa si Leonard sulod lang sa 29 minutos ug kuwang na lang siya og dos puntos aron matupngan ang iyang career high sa regular-season.
Midugang og 24 puntos si Williams alang sa Clippers kinsa miduwa nga wala si Paul George.
Samtang gipaduwa si Giannis Antetokounmpo sulod lang sa 22 minutos apan nakahimo kini og dakong danyos sa dihang gilubong sa Milwaukee Bucks ang New York Knicks, 128-102.
Sa laing duwa, gikutlo sa Utah Jazz ang ilang ikanapulo nga sunodsunod nga kadaugan, 118-107, batok sa Brooklyn Nets, gilubong sa Dallas Mavericks ang Golden State Warriors, 124-97. Nasugakod sa Atlanta Hawks ang kainit sa Phoenix Suns, 123-110. (JBM)