ANG deadline sa pag-negotiate kalabot sa pagdepensa ni WBC bantamweight champion Nordine Oubaali batok sa mandatory challenger nga si Nonito Donaire, Jr. giuswag ngadto sa Enero 17.
Kon dili gihapon magkasinabot ang duha ka kampo, himuon gilayon ang bidding.
Ang pagbingat niini nagagumikan sa mga holidays. Sa sayo pa ang WBC mipahibawo ug mihatag og 30 ka adlaw sa duha ka kampo aron sabutan ang championship fight. Kini motapos unta niadtong Enero 3, 2020.
Kon dili makatuman ang duha ka kampo, ang World Boxing Council (WBC) mao nay mohimo sa purse bidding hearing nga ipahigayon sa headquarters sa Mexico City.
Si Oubaali ubos sa MTK Global Promotions samtang si ang Ringstar ni Richard Schaefer mao usab ang nagrepresentar ni Donaire. (JBM)