ANIA na pod sila si Dondon, Urias, Monico ug Tonton sa ilang abutanan dinhi sa gubaong bilding nga nahimutang sa kalye Rosal. Kining bilding wa nay suga panahon sa kagabhion ug anhi silang upat ka batan-on maghimo sa ilang bisyo, ang pagsuyop sa ginading drugas, ang shabu. Sila mga anak sa mga sapian nga mga ginikanan. Si Dondon anak og abogado. Si Urias anak og magpapatigayon. Si Monico anak og inilang pulitiko. Ug si Tonton anak og doktor nga dunay klinika dinhi sa siyudad sa Sugbo. Ang ilang mga ginikanan nahisakop sa hataas nga hut-ong sa katilingban.
Apan kining maong mga batan-on hinayhinay nga nahisalaag pahilayo sa matarong nga dalan nga gitagana kanila sa ilang mga ginikanan. Pagka karon nia na sila, nag-pot session aron mohigop na sab sa ginadiling drugas. Nagdala silag rechargeable night lamp nga mohatag og kahayag sa sulod ning usa ka lawak sa bilding. Wala na gani kini sila magtagad o mag-atiman sa ilang pagtungha, kay anaa pa man kini sila sa hayiskol. Si Tonton nagpanuigon og trese, si Urias katorse, si Monico 13, ug si Dondon katorse.
Wala mahibawo ang ilang tagsa-tagsa ka ginikanan ning ilang gibuhat. Ning ilang bisyo may tighatag nila sa ginadiling drugas, si Pakong, ang giilang batang linti dinhi sa kalye Rosal. Dili siya mahadlok mopatay kay may mga kauban siyang mga batang linti pod dinhi sa siyudad. Dugay na siya ning iyang trabaho sa pagpayuhot og ginadiling drugas. Higala siya ni Monico.
Samtang nagpadayon sila sa ilang gibuhat kalit lang mitumaw ang usa ka bata nga kulot og buhok nga miabli sa pultahan. Nakalingi silang upat nga nahikugang.
“Mga parts, may bata nga nakasulod. Naa siya, o, nagbarog sa pultahan!” matod ni Urias ngadto sa tulo niya ka kauban. “Animal ning bataa, ay!”
“Hoy, bata! Nganong misulod ka? Wa ka mahadlok nga gabii na man ron ug nia pa gyud sa gubaong bilding?” singhag ni Dondon nga naglagot ug nadutlan na sa iyang gisuyop. “Gusto ka tingali nga among karnehon dinhi, no?”
“Manoy, misa man rong orasa diha sa Basilica, nganong wa man mo manimba? Pista baya ugma sa Senyor Santo Nino,” hinay ug bugnaw ang tingog sa batang kulot og buhok nga ginuntan sa huros sa bugnawng hangin. “Di man na maayo ang inyong gibuhat! Makadaot man na sa inyong lawas ug sa inyong ugma. Mga batan-on pa god mo!”
“Yati, mga parts, gi-sermonan man nuon ta! Morag si kinsa nga mibadlong nato! Unsa man, ato na ning ihawon? Nailhan na ra ba ta. Ambi nang imong pistola, bi!” ni Monico nga miibot sa pistola gikan sa hawakan ni Urias. Iyang gition sa bata ug gikablit, apan wala kini mobuto. Gikablit ni Monico sa makadaghan apan wala gyud makabuto bisan kargado kini sa bala.
Miduol kanila ang bata ug gikuha ang pistola gikan sa kamot ni Monico nga wala mahaglihok tungod sa kahibulong. Gipanglabay sa bata ang mga ginadiling drugas ug ang mga paraphernalia. May kusog nga huros sa hangin gikan sa gawas sa bilding ug ang upat ka mga batan-on nahabanda sa sementadong bungbong ug nakuyapan silang tanan. Sa pagbalik sa ilang maayong panimuot nabatyagan nila nga diha na sila sa sulod sa prisuhan. Diha usab ang tagsa-tagsa nila ka ginikanan.
Unya may gisulti si Urias kang Monico, “Bay, kadtong batang kulot og buhok, kon wa ko malimot, ang iyang nawong kaamgid ni Santo Nino! Gibadlong ta sa atong Patron sa Sugbo. Magbag-o na ta, Bay Monico, Tonton, Dondon, kay nakita pod nako nga wa tay maayong ugma ning atong bisyo!”
Giablihan sa usa ka pulis ang prisuhan ug misulti nga gipiyansahan na sila sa ilang mga ginikanan nga tua sa gawas naghuwat kanila. (Katapusan)