ANAK, amahan ug kabanay nga mga construction worker nasikop sa buy-bust sa mga sa Provincial intelligence Branch ug Provincial Drug Enforcement Unit (PDEU) sa Cebu Provincial Police Office, Miyerkules sa udto, Enero 15, 2020.
Si Police Lt. Col. Marlu Conag, pangu sa Provincial Intelligence Branch (PIB) sa CPPO, maoy nangu sa buy-bust nga miresulta sa pagkasikop sa mga dinakpan.
Giila ni Conag ang mga nadakpan nga sila si Roselle Adlawan, 42 ug anak niining si Jahrell Adlawan, 19, taga Sityo Aning, Barangay Candulwan, lungsod sa Minglanilla. Samtang ang ikatulo nga nadakpan mao si Adrian Adlawan, taga Barangay Lower Linao sa maong lungsod.
Matod pa ni Conag nga ang ilang target mao si Adrian, apan sa dihang gihimo ang buy bust operation, naabtan nila nga nag pot session ang mag-amahan.
Nasuta usab sa grupo ni Conag nga naka break sa trabaho atol sa paniudto ang tulo dihang wa magtuo nga ang katapusang mipalit og shabu ngadto na kang Adrian usa diay ka pulis. (BBT)