GUMIKAN sa kalimitado sa oras sa pag-abot sa imahen ni Sr. Sto. Niño sa dakbayan sa Lapu-Lapu, gikinahanglang tumanon ang schedule aron nga tukmang 6:00 sa buntag sa Enero 18 makagikan alang sa seaborne (fluvial) procession.
Ang tigpamaba sa Lapu-Lapu City government, Oscar Pineda, nipahibawo nga gikatakda nga sa tungang gabii o 1:00 sa kaadlawon sa Enero 18 ang oras sa pag-abot sa Balaang Bata sa tiilan sa unang taytayan sa Mactan, gikan sa dakbayan sa Mandaue.
Base sa nasabutan atol sa coordination meeting sa Traslacion 2020 Lapu-Lapu nga dawaton ni Lapu-Lapu City Mayor Junard Chan ang imahen nga i-turn over ni Mandaue City Mayor Jonas Cortes, dunganan sa welcome rite sa Sinulog dancers.
Dili magdugay i-motorkada ang urna nga gisudlan sa imahen lahos sa Virgen Dela Regla National Shrine, Barangay Poblacion.
No balloon
Gipahibawo sab ni Pineda nga gidili ang mga deboto nga magdaladala og balloon ingon man ang pagpahigayon og fireworks sa areas nga ma-agian sa procession “for security reasons,” paingon na sa simbahan sa Virgen Dela Regla National Shrine ingon man ang pagbiya niini paingon sa Naval Base.
Birhen sa Regla
Samtang, sugdan ang pahawok sa Sr. Sto. Niño ngadto sa mga deboto diha sa altar sa Birhen sa Regla church sa 2:30 am nga sud lang sa usa ka oras ug 15 minutos ug gikatakdang motapos sa 3:45 am.
Gipahumdoman sab ang mga deboto nga limitado ra ang makasud sa simbahan apan sa kadtong dili na makasud adunay upat ka LED screen nga itaod sa City Auditorium ug basketball court, aron makita ug makapaminaw gihapon sa maong misa
Navforcen
Insaktong 4:00 a.m. sugdan ang santos nga misa, sundan sa motorkada paingon sa Naval Forces Central (Navforcen) sa Barangay Canjulao nga ikatakdang moabot sa 5:45 sa kaadlawon.
Giseguro sa organizers nga sa 6:00 sa buntag makasugod gilayon ang seaborne procession balik sa dakbayan sa Sugbo.
Gipahibawo karon sa City Traffic Management System CTMS sa dakbayan sa Lapu-Lapu nga alas 10 sa gabie pa lang sa Biyernes Enero 17 sirad-an na ang mga dalan paingon sa merkado ug simbahan sa Birhen sa Regla.
Kini aron paghatag ug higayon sa pagpangandam sa Traslacion sa Sabado sa kaadlawon Enero 18 kun ang pag-abot sa imahen sa balaang bata Senior Sto Niño ug Birhen sa Guadalupe gikan sa dakbayan sa Mandaue.
Unang taytayan
Gawas sa mga dalan gikatakdang sirad-an usab ang unang Mandaue-Mactan Bridge sa alas 10 sa gabii sa Enero 17 hangtod na sa ala 1:30 sa kadlawon sa Enero 18 alang sa Traslacion.
Ablihan kini pagbalik sa ala 1:30 hangtod sa alas 5 sa kadlawon apan sirad-an na usab kini sa alas 5 sa kaadlawon hangtod mahuman ang seaborne procession sa habig sa dakbayan sa Lapu-Lapu.
Ang mga dalan nga sirad-an mao ang tibuok G.Y Dela Serna ug pipila ka bahin sa Manuel L. Quezon National Highway gikan sa unang Mandaue-Mactan Bridge paingon sa P. Rodriguez St., sa Looc Central School.
Sirad-an usab ang S. Osmeña St., paingon sa eskina Ceres St., hangtod sa eskina Lopez Jaena St., kun ang entrance nga bahin sa simbahan sa Birhen sa Regla.
Ang tibuok Lopez Jaena St., gikan sa Mantaue Rd., paingon sa P. Rodriguez St., eskina Cleland St., sirad-an sab.
Ang pipila ka bahin sa P. Rodriguez St., gikan sa junction sa Canjulao lakip na ang Looc Chevron St., hangtod sa eskina B.M Dimataga St., sa Brgy Poblacion ug ang tibuok dan mismo sa Dimataga ug Risdon St., sirad-an usab.
Ang mga motorista nga paingon sa dakbayan sa Sugbo, Mandaue ug MEZ-1 fikan sa Looc, Babag ug Cordova mahimong moagi sa mga alterntatibong rota nga mao dan A. Tumulak via Merjjin, S. Osmeña ug Hoops Dome Road dayon left turn sa Maximo V Patalinghug avenue, right turn M.L Quezon Nat’l highway sa Pajo ug lahos na sa habig sa Marcelo Fernan Bridge.
Ang mga motorsita gikan sa Marigondon ug Basak nga mopaingon sa dakbayan sa Sugbo, Mandaue o MEZ-1 mahimong moagi sa MVP avenue, right turn sa MLQ Nat’l highway sa Pajo ug lahos na sa habig sa Marcelo Fernan Bridge.
Ang mga motorista nga gikan sa dakbayan sa Sugbo, Mandaue o MEZ-1 agi sa Marcelo Fernan Bridge nga mopaingon sa Marigondon o lungsod sa Cordova mahimong mo left turn sa junction sa Lapu-Lapu City Hall paingon sa Seawage-Matumbo road, left turn sa MVP avenue (Sangi junction) ug lahos na sa ilang destinasyon.
Merkado sa Lapu-Lapu
Ang tanang Public Utility Jeepney (PUJ) ug mga Filcab paingon sa merkado sa dakbayan makapasakay ug kanaog lang sa ilang pasahero sa karaang terminal sa Brgy Pajo (atubangan sa GMC).
Ang mga PUJ ug Filcab gikan sa Cordova ug paingon sa merkado sa dakbayan makapanapg lang sa ilang mga pasahero sa P. Rodriguez St., sa Barangay Looc duol sa Tojong General Hospital ug St. Francis Funeral Homes.
Ang temporayong sakayan ug naugan usab sa mga Tricycle paingon sa nagkadaiyang dapit sa dakbayan mao ang GUSA Basketball court sa Humay-Humay.
Ang mga tricyle nga paingon sa mga Barangay Babag, Kalawisan, Timpolok, Canjulao ug Carahay mahimong makapakanaog ug makapasakay temporaryo sa mga pasahero sa P. Rodriguez St., eskina Dad Cleland ug Lopez Jaena (agi Guiwanon Road). (GCM, FVQ)