KAPIN sa 1,000 ka mga pulis gikan sa Probinysa sa Sugbo, Bohol ug Negros Oriental nangabot na sa Cebu City Police Office alang sa dugang pwersa sa siguridad sa Sinulog grand parade.
Hugot nga siguridad sa Cebu City Sports Center ipatuman tungod sa presensya ni Presidente Rodrigo Duterte.
Naandam sa kapulisan ang ilang pagpatuman sa siguridad sa mga kalihukan sa Sinulog sama sa Walk with Mary sa Biyernes sa kaadlawon, Enero 17, seaborne solemn procession sa Sabado, Enero 18, hangtod na sa Sinulog grand parade sa Dominggo, Enero 19.
Sa listahan nga mga personnel nga gipadala sa CCPO, moabot ngadto sa 4,352 ka personnel ang security force, wa pay labot ang mga pulis nga gidugang nga sobra usab sa usa ka libo.
Matod ni Police Colonel Engelbert Soriano, officer-in-charge sa CCPO, nga ang maong mga pulis nga nangabot ipang apod-apod sa Basilica Minore del Santo Niño, ruta sa Sinulog grand parade ug ang labing daghan i-deploy sa sports center nga moabot og 1,000.
Gibahin na usab sila sa uban pa nga mga unit nga gitahasan sa pagbantay sa grand parade.
“Lahat ng parade routes and entrance. That is 6.4 km in length. Sa route security yun. Meron tayong venue security. We need around 300 for Basilica. Around 100 para sa Fuente Osmeña and then thousand sa Cebu City Sports Center. Meron din tayong task unit,” butyag ni Soriano.
Giangkon niya nga tungod sa impormasyon nga motambong si Duterte, gisaka pa nila ang ilang alert status.
Nagdugang silag personnel nga maoy mobantay ni Duterte sa sports center.
Seguridad
Si Fr. Aladdin Luzon, chairperson sa cluster of safety, security, and peace and order sa Basilica, nagkanayon nga atol sa final briefing nila sa kapulisan, nasabutan nga sundon ang niadtong milabayng solemn procession ug Traslacion diin ang mga pulis ni-cordone sa imahen ni Berhin Maria ug Santo Niño.
Nakita nila nga mas luwas kon mga pulis ang modala sa mga imahen aron way mga deboto nga makaduol nga makahatag na hinuon oog kalangay sa prosesyon.
Doblehon
Padoblehan usab nila ang security sa Basilica gumikan sa pagsugwak na sa daghang Katolikong deboto nga manimba matag gabii.
Sa bana-bana sa mga opisyal sa Basilica, moabot ngadto sa 20,000 ngadto sa 30,000 ang mga tawo nga nanimba sukad niadtong Martes sa gabii nga dili na makaya sa mga pulis ug security guards.
Dugang ni Luzon nga ang respetohon sa mga tawo mao lang ang mga pulis hinungdan nga ilang gisugyot ngadto sa kapulisan nga abagan sila ug dugangan silag personnel.
Samtang di momenos napulo ka mga lokal nga kagamhanan gikan sa lalawigan sa Sugbo ang miboluntaryo nga motabang sa pagresponde panahon sa emerhensya atol sa mga kalihukan sa Sinulog.
Matod ni Provincial Disaster Risk Reduction and Management Office (PDRRMO) head, Neil Sanchez, nga naka standby ang pipila sa quick response team sugod niadtong Enero 12, 2020.
“Kita sa Province, we are there to support them support in terms that we are also deploying or mobilizing the municipal disaster and risk reduction and management offices in certain staging areas and mga strategic points sa sectors along the course”, matod ni Sanchez sa Enero 15, 2020 nga interbyu.
Sa pasiunang lista sa PDRRMO, lakip sa mga miboluntaryo mao ang lungsod sa Tabogon, Medellin, Danao ingon man ang siyudad sa Mandaue ug Lapu-Lapu.
Andam na usab ang mga ambulansya, fire trucks ug rescue truck nga gi request sa PDRRMO sa lokal nga ipahimutang sa Cebu South Bus Terminal (CSBT) ug PDRRM office. (AYB, ANV)