TULO ka mga kaso ang gipasaka batok sa Sugboanong basketbolistang si Eluid Poligrates, 33, ngadto sa Cebu City Prosecutor’s Office sa Miyerkules sa hapon, Enero 15, 2020.
Duha sa mga kaso mao ang ilegal nga paghupot og armas ug pagpangawat kun theft.
Ang laing kaso gipasaka sa iyang kanhi 39-anyos nga girlfriend, kinsa nipasaka og kasong kalapasan sa Republic Act 9262 kun Anti-Violence Against Women and Their Children Act of 2004 tungod sa giingong pagpanapat kaniya.
Si Poligrates nagduwa sa Philippine Basketball Association (PBA) D league.
Matod ni Police Staff Sgt. Jelou Destacamento nga ang una nga kaso nga giatubang ni Poligrates mao ang giingong pagapanapat ni Poligrates sa iyang kanhi uyab.
Gikiha usab siya og kasong ilegal nga paghupot og armas nga gipanag-iya sa iyang kanhi uyab gihapon kay naaktuhan siya sa mga pulis nga naghupot niini.
Samtang ang ikatulo nga kaso may labot na sa giingong pagkuha sa basketbolista sa selpon sa babaye nga napalit na niini gikan kang Poligrates.
Makagawas si Poligrates sa bilanggoan kon motakda ang korte og piyansa, apan kay wa pa, magpabilin siya sa bilanggoan sa Abellana Police Station.
Nanghimakak
Si Poligrates mihimakak tanang pasangil sa iyang kanhi uyab, kinsa iyang giingong aksidente nga iyang gikakita sa usa ka convenience store niadtong Martes.
Dihang uyab pa sila, duna silay napalit nga yuta nga nakapangalan nilang duha.
Kay nagbuwag naman sila, ang iya lang nga mahangyo ang babaye nga kuhaon ang mga papeles sa ilang yuta nga anaa niini tungod kay sa unang nasabotan nila, siya ang mopalit.
Dugang ni Poligrates nga di ang babaye ang iyang katuyoan sa iyang pag-uli sa Sugbo ang pagpakigkita.
Mobiyahe unta siya sa paingon sa Leyte alang sa ilang duwa, apan tungod sa pagbuto sa bulkan nga Taal, kini naoktaba.
Dinhi na lang siya maghuwat alang sa ilang duwa sa Davao, apan naatlan nga sila nagkakita sa convenience store.
Matod ni Poligrates nga ang mga pasangil sa iyang kanhi uyab batok kaniya di tinuod.
Dihang sila nagkakita, iyang gikuha ang armas sa babaye kay nahadlok siyang tinud-on ang bahad niining pusilon.
Siya ang naabtan sa mga pulis nga nagkupot.
“Ang tinuod lang nga akong gikuha ang armas sa iyang sakyanan kay sa una, iya na ra ba kong gibaharan. Aron ma-safety lang, mao to akong tuyo,”matod ni Poligrates.
Ang selpon iya kadto ug di sa iyang uyab.
Duna lay nadiskobrehan si Poligrates hinungdan nga iyang gitan-aw.