Task force batok kolorum gimugna na

HINGPIT na nga gisugdan pagmugna ang local inter-agency task force batok sa kolorum nga mga sakyanan human sa panagtagbo sa lokal nga kagamhanan sa siyudad ug sa Land Transportation Franchising and Regulatory Board (LTFRB) niadtong Enero 15.

Kini human nagpadangat og special report si Konsehal Roger Abaday niadtong Lunes Enero 13 kalabot na sa mga kolorum nga taxi ug buot nga dalhon na kini ngadto sa national office sa LTFRB tungod kay walay aksiyon ang buhatan dinhi sa rehiyon.

Atol sa panagtagbo gibutyag ni Konsehal Teodulfo Bong Lao, tsirman sa public Utilities ug vice chairman sa traffic, nga nagpasalamat siya sa LTFRB Regional Director human hingpit na nga namugna ang task force.

Gilangkoban ang task force sa LTFRB, Land Transportation Office (LTO), Highway Patrol Group (HPG), Cagayan de Oro Police Office (Cocpo), Roads and Traffic Administration (RTA) ug uban pa nga mga law enforcement agency.

"Duna nay schedule actual na dayon mag dry run mi didto kung unsa sa pag-identify sa colorum," dugang pa.

Andam usab ang lokal nga kagamhanan sa siyudad sa paggahin og tawo alang sa task force sama sa 10 ka mga sakop sa RTA ug lakip na kapulisan.

Samtang gibutyag usab ni Amenoden Guro, regional director sa LTFRB-10, nga ang task force maoy motutok niini nga problema.

"Mag create tayo ng task force but before that meron tayong gagawing workshop paano nila ma-determined yung counterpart natin itong mga colorum na mga taxi unit," matud ni Guro.

Gitakdang ipahigayon ang workshop sunod bulan mga Pebrero 4 o 5 ug paghuman ipahigayon na ang dry run.

Kung makitang epektibo ang task force sa pagsugpo ug pagwagtang sa kolorum nga taxi buot ni Lao ug ni Konsehal Romeo Calizo, tsirman sa Roads and Traffic nga maghimo og ordinansa kalabot na niini.

"Long term na ni siya dili lang kay karon lang kay daghan kaayo colorum, magduso ta og ordinansa para ma institutionalized na ni ang task force, isa sab duna nay budget every year para maka operate , ma implement gyud nato ang existing rules," dugang niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph