UBAY-UBAY ka mga tindahan ang nasapon nga nag-isyu pa og mga cellophane ug gipamulta atol sa unang adlaw sa pagpatuman sa ordinansa sa dakbayan diha sa regulasiyon sa plastik.
Sugod Enero 15 wala na gitugotan ang mga patigayon nga mag-isyu og mga plastik tungod kay duna nay multa nga P3,000 matag isyu.
Sa pakighinabi sa Sun.Star Superbalita kang Engr. Armen Cuenca, tsirman sa City Local Environment and Natural Resources Office (Clenro) anaa sa 16 ka tindahan ang na-isyuhan og ordinance violation receipt (OVR) nga gipatuman usab sa dakbayan sugod ning tuiga.
"Naay lima ka tenant sa mall, ang uban mga karenderya sa Barangay 24 diha atbang sa Ayala nga mga tindahan diha siyam (9), sa Kapitolyo bitaw naay tindahan isa, isa pud sa Waling-waling street sa Carmen," matud ni Cuenca.
Gidugang pa niini nga pahimangno lang sa katawhan nga suportahan kini nga kampanya ug padayon na nila kining himuon aron wala nay plastic pollution sa siyudad.
"Tuloy-tuloy na ni, amo lang reminders sa mga tindahan lagi nga gidili na gyud nato, gi-impose na nato manghinaot mi nga suportaran aron wala nay plastic pollution," dugang pa.
Nag-aghat usab kini sa katawhan nga suportahan ang "no to plastic" ug balibaran ang tindahan nga mag-isyu pa niini. I-report usab sa Clenro ang bisan kinsa nga makasupak niini nga balaod lakip na paglabay sa basura sa bisan asa nga dapit.