KADTONG kontra sa suicide bombing, moingon nga yawan-on ug dautan kining buhat kay may mga linalang nga mga inosente ug mga kabtangan nga mawala ug mangadaot. Apan giisip kini sa mga suicide bomber nga may kalabutan sa giyera kun gubat, mopatay ug magpakamatay aron paglaban ug pagpanalipod sa ilang gituohan nga doktrina ug idelohiya.
Apan lahi kining kang Jefferson. Magpakamatay siya aron way matakdan sa iyang sakit. Manyak siya ug nataptan sa kagaw nga human imuno-deficiency virus (HIV). Ang iyang sakit kay acquired immuno-defeiciency syndrome (AIDS). Mogimok ang iyang lawas kon motokar ang iyang biga ug may maapektahan nga mga biktima. Dili siya makapugong sa iyang kaugalingon nga madukirok sa iyang kauwagon. Magpakamatay na unta siya, apan may panghitabo nga nagkinahanglan sa iyang kamatayon ug makaluwas kini sa katawhan.
Tisoy si Jefferson, ambungan ug maskulado, ug wala magdahom nga mataptan sa kagaw sa AIDS. Wala siya mahibawo kon kinsay nakatakod kaniya. Naghingapin ang iyang kabigaon sukad nahimo siyang callboy gumikan sa tumang kakabos ug kawad-on. Inday- hilay ang iyang na-anhing nang inahan ug nagdako siya sa eskuwater nga dapit. Nasinati na niya sukad sa iyang pagkabata ang pagka dautan ug pagka yawan-on.
Naghitak sa ilang dapit ang pagpayuhot sa gidiling mga drugas. Nailhan niya kon si kinsa ang drug queen, si Gilda, ang biyuda sa napatay nga drug lord sa ilang dapit. Hamtong na si Gilda ug walay anak, ug higal sa lawasnong panginahanglan. Magpahilabot kini sa mga lalake nga iyang makursunadahan. Usa na niini si Jefferson.
May nakita ug nabati na si Jefferson niadtong mga nangaalaot ug nangamatay tungod sa gidiling mga drugas. Mao lagi kadto ang nahitabo sa iyang inahan nga gilugos ug gipatay sa mga adis-adis. Ug nailhan niya ang iyang amahan kon kinsa kini. Mitunga ang iyang amahan sa haya sa iyang inahan. Usa ka opisyal mga pulis.
“Kapuyo ko ang imong Mama Salve kaniadto,” nagpaila kaniya ang iyang amahan nga si Tenyente Oscar del Barrio. “Ug nakigrelasyon ako kaniya bisan sa kasayuran ko sa iyang pagka babaye. Nagpakasal kami maskin nagsabak siya sa binhi sa laing lalake. Apan nagbudhi siya kanako ug miuban sa laing lalake nga wala niya mahibaloi nga adis-adis diay. .Ang lalake maoy una niyang gugma ug naaghat lang siya sa pakigminyo kanako kay nagsabak lagi siya kanimo, kay gibiyaan sa lalake. Apan dihang nahibalik ang lalake nga iyang gihigugma sa inud-anay, iya kong gibiyaan ug iya kang gidala. Wala na ako mopugong kaniya. Gihatagan ko siyag kagawasan.”
Nahinumdoman ni Jefferson nga makausa giila ug gitahod niyang amahan si Tenyente Oscar del Barrio. Wala siya makabalibad dihang gihangyo siya nga mosuporta sa pagsumpo sa mikatap nga gidiling mga drugas. Mao nga nakahukom sa hilom si Jefferson nga makigdulog sa drug queen nga si Gilda. Mamatay usab kini sa kagaw nga iyang nahuptan karon.
“Ayaw kabalaka, Papa Oscar,” mipasalig si Jefferson ngadto sa nagsagop kaniya ug nag-isip kaniya nga usa ka tinuod nga anak. “Makalaom ka nga tapuson ko ang kinabuhi sa nagtago nga drug queen. Ako nay mahibawo kaniya.” (KATAPUSAN)