GIPASIGARBO ang mga lokal nga produkto karong Sinulog sa bag-o lang gibuksan nga Sinulog Fiesta Fair 2020 nga gipangulohan sa Department of Trade and Industry (DTI) 7.
Samtang gilusad usab sa susamang adlaw, Huwebes, Enero 16 ang labing una nga OTOP Philippines Hub sa Passenger Terminal sa Pier 1, dakbayan sa Sugbo.
Ang Sinulog Fiesta Fair 2020 molungtad hangtod Enero 26 diin 49 ka mga micro, small, and medium enterprises (MSMEs) ang ning-apil.
Matod ni Marivic Aguilar, DTI Cebu Provincial Office chief sa Small and Medium Enterprise Development Division nga ang fair giapilan usab sa One Town, One Product PH ug sa Kapatid Mentor ME (KMME) programs sa DTI.
Kon itandi ang miapil karong tuiga ug sa 2019, mas ubos kini.
Niadtong 2019 Sinulog Fair, anaa kini 96 ka exhibitors ug enterprises. Niabot usab sa P10.2 million ang sales niini.
Anaa sa SM City Cebu Atrium ang Sinulog Fair alang karong tuiga. (HBL)