NATANGGONG sa Waterfront Police Station ang usa ka 40 anyos nga lalakeng gipasanginlan sa duha ka mga babaye nga nanghikap sa ilang mga sampot samtang nanuroy sa night market sa dan Colon niadtong Miyerkules sa gabii, Enero 16, 2020.
Gituohang hubog si Rene (di tinuod nga ngan), 40, dihang gireklamo sa duha ka mga babaye, 19 ug 20 anyos.
Si Police Staff Sgt. Raquel Gacosgosim sa Women and Children Protection Desk sa Waterfront Police Station, niingon nga ang duha ka mga babaye nagpakitabang sa mga pulis.
Gidakop si Rene apan alas 5 sa hapon sa Huwebes gibuhian kay wa na moreklamo ang duha ka mga babaye.
ISNATSER
Samtang suspetsadong esnatser nasikop niadtong Miyerkules sa gabii gawas sa Basilica Minore Del Santo Niño human makitang kadudahan ang iyang mga lihok.
Si Police Major Joemar Pomarejos, hepe sa Waterfront Police nga nahinabi sa Superbalita Cebu, niingon nga iyang sakop nga na-assign sa dapit nakabantay kang Dennis Estrellada, 43, lumolopyo sa Sityo Manggahan, Barangay San Roque, Dakbayan sa Talisay.
Dihang gipangutana si Estrellada, wa kini mahimutang.
Girekisa si Estrellada ug nakuhaan og duha ka mga kutsilyo sa hawakan, lakip na ang drug paraphernalia. (BBT)