GIBUTYAG ni Shalimar Tamano, Regional Director sa Department of Tourism (DOT), nga punopuno na ang mga hotel ug resort sa dakbayan sa Lapu-Lapu nunot ning nagsingabot nga kapistahan ni Señor Santo Niño sa dakbayan sa Sugbo.
Kini sukwahi sa kabalaka sa pipila ka mga hotel ug resort nga menos ang bookings karong Sinulog gumikan sa Airbnb.
Ang Airbnb usa ka online marketplace alang sa booking sa lodging, diin sagad homestays ug promo sa bakasyon nga mas barato kaysa naandan.
Matod ni Tamano nga iyang gikumusta ang mga dagkong hotel ug resorts sa Sugbo ug iyang nasuta nga puno gayud kasagaran karong Sinulog.
“We cannot give the figures, we have to finish the Sinulog to count it but in my calls with our players, operators, hotels it’s very good lots of hotels cannot cater visitors it’s difficult to find a room right now,” matod ni Tamano.
“There’s a certain sector mga murag kanang same ang prices sa Airbnb maoy medyo (affected) pero I think na recover man,” dugang ni Tamano.
Si Tamano maoy usa sa misugat sa dul-an usa ka libo ka mga balikbayans ug dumuduong sa Terminal 1 ug 2 sa Mactan Cebu International Airport MCIA kagahapon Huwebes Enero 16.
Ang maong mga flights gikan sa Taipei, Hong Kong ug Los Angeles.
Ang naasoyng engrandeng pagsugat sa mga dumuduong gipasiugdahan sa Balik Cebu Program nga mipahigayon na niining maong kalihukan sulod sa 19 ka tuig.
Misugat sa mga dumuduong ang usa ka Rondalla ug mga dancers sa Sinulog sa gawas nga bahin sa Terminal.
Gipangsab-ongan usab ang dumduduong ug mga garland.
Matod ni Steve Dicdican ang General Manager sa Mactan Cebu Interntional Airport Authority (MCIAA) sa gihapon usa ka welcome dinner ang giandam alang sa mga balikbayan kagabie Enero 16 sa Ayala Center Terraces.
“As you can see daghan gyud ang nitambong para sa atoang Sinulog and we expect nga more people will come as days progress,” matod ni Dicdican. (GCM)