MGA deboto ni Sr. Sto. Niño nga mosalmot sa foot procession karong Sabado sa hapon, Enero 18 ang giawhag nga mas maayo magdala og payong o bisan unsa nga panangga.
Kay bisan kon walay major weather disturbance nga gi-monitor ang Philippine Atmospheric, Geophysical and Astronomical Services Administration (Pagasa), napanlantawan nga masinati ang hinay ngadto sa kasarangan nga pag-ulan sa hapon o sa gabii.
Kini base sa gipagawas nga special weather forecast alang sa Sinulog Festival, matud ni Jhomer Eclarino.
Gihulagway nga maayo ang panahon karong weekend, apan masinati ang pagpanganuron inubanan sa hinay ngadto sa kasarangan nga katag nga pag-ulan sa Sabado.
Tungod lang hinuon kini sa localized thunderstorm. Anaa man ang tail end of the cold front ug hanging amihan apan wala kini sila direktang’ epekto sa Sugbo.
Samtang, dili usab angay nga kabalak-an ang pagpahigayon sa fluvial procession kay makasinati lang og hinay ngadto sa pagkabaluron diin aduna lang pagdako sa balud nga .75 meters ngadto na sa 1.25 meters.
Ang high tide karong Sabado, magsugod sa alas 3:48 sa kaadlawon nga moabot sa 1.05 metros ang pagtaub.
Samtang maayo usab nga panahon, nga adunay usahay nga mapanganuron ang masinati atol sa adlaw sa adlaw sa fiesta sa balaang bata ug sa Sinulog grand parade karong Dominggo, Enero 19.
Hinuon tungod gihapon sa localized thunderstorm, adunay kahigayunan nga magtutaligsik ug ulan sa hapon ug gabii, hinuon menus ra ang kahigayunan niini.
Apan tambag sa PAGASA nga mas maayo ang kanunay nga pag-inum sa tubig o bisan unsa nga makapa-hydrate kanimo ilabi na alang sa mosalmot sa parade, tungod sa init nga panahon.
Aduna hinuoy 24 to 31 degree Celsius nga temperatura, ug kainiton nga mabatyagan sa tawo nga moabot sa 34-35 degree Celsius, karong Sabado ug Dominggo. (FMD)