TAMBUNGAN ni Presidente Rodrigo Duterte ang unveiling sa Mactan Cebu International Airport (MCIA) terminal 1 karong Dominggo, Enero 19 atol sa pagbisita niya sa Sugbo sa kasaulogan sa Sinulog Festival.
Si Duterte maoy mangulo sa unveiling sa bag-o lang nahuman nga renovation sa Terminal 1.
Ang renovation nga gihimo sa GMR-Megawide Cebu Airport Corp. gisugdan kini niadtong Hulyo 2018 ug hingpit kining nahuman niadtong Agusto 2019.
Diha sa “airport village” sa maong bag-ong renovated terminal ang unveiling nga pagahimuon ni Duterte inubanan sa mga dagko nga opisyal sa MCIAA, GMCAC, ug sa Department of Transportation.
Gikatakda usab nga moabot si Transportation Secretary Arthur Tugade kinsa motambong sa maong kalihokan.
Usa sa mamatikdan sa maong bag-ong renovated terminal, mao ang airport village diin mao kini ang karaan nga arrivals area diin anaa na kini karon mga food and beverage ug retail stores.
Abli usab kini sa publiko diin mamahimo nga maghuwat kadtong mosugat sa moabot nga pasahero.
Gigamit na usab sa maong airport ang Automatic Tray Return System sa mga boarding gates niini.
Kadtong boarding gates sa international kaniadto, gihimo na kining gates 9-12 alang sa domestic passengers.
Ang kaniadto nga taxi bay area gihimo na usab kining transporation hub diin anaa makit-an ang bus, taxi, vans, ug pribado nga sakyanan.
Anaa sa P17 bilyones ang gi-invest sa GMCAC sa parehong Terminal 1 ug 2 sa MCIA.
Gikataho nga anaa na sa 11 milyones ka mga pasahero ang maakomodar sa MCIA matag tuig gikan sa walo ka milyon lang kaniadto.
Anaa na usa’y Plaza Premium Lounge ang Terminal 1 alang kini sa business class passengers. (HBL)