DAGKONG supply sa shabu nga nasakmit sa kapulisan sa Sugbo hayan alang sa Sinulog.
Gituohan karon sa officer- in-charge sa Cebu City Police Office (CCPO), Police Colonel Engelbert Soriano, nga ang mga nasakmit nga ilegal nga drugas nga mobalor sa minilyon ka pesos alang kini sa sinulog.
Matod ni Soriano, sa nanglabay nga mga adlaw nga nakakuha silag binulto sa gituohang shabu ug dako ang posibilidad nga nangabot sa siyudad sa Sugbo ang daghang supply tungod sa Sinulog.
Kon nakaalerto ang kapulisan nakaalerto usab ang mga durugista nga ma baligya nila ang ilang ilegal nga drugas sa mga mogamitay niini.
“Tumaas kasi tuwing sinulog season. Tumaas ang seizure nang iillehal drugs so i would like to believe ito yung signs na nakaalert sila so yes tinitignam naming,” matod ni Soriano.
Wala na maalarma pa si Colonel Soriano sa nadakpan nga usa ka grade 8 nga tinun-an sa Gothong National High School nga nakuhaan og dul-an duha ka milyon nga balor sa gituohang shabu.
Matod niya nga mao na kini ang modus sa mga durugista nga mogamit nag nga menor de edad tungod sa balaod sa Juvenile Justice Act nga sa ilang pagtuo dili na sila mapasakaan og kaso.
Ang maong dinakpan gi duso na sa Pardo Police Station ngadto sa Department of Social Welfare and Development (DSWD) ug gipasakaan na kini og kaso sa kapulisan.
Gisuportahan usab ni Soriano ang programa sa Philippine Drug Enforcement Agency (PDEA) 7 nga 'Oplan EcstaNo' diin ang ilang target mao ang pagpakatap sa ecstasy panahon sa mga street party.
Matod niya nga hugot ang ilang monitoring ug gitinguha nga dili kini mapagawas sa mga durugista ug sa mga hotel pa lang ila na kining masakmit.
“Pag may party may drugs. We are doing our best to monitor before ito ma distribute. Mino-monitor narin sila. Hopefully with the help of the public we can get important information and initiate positive operation regarding sa ecstasy,” dugang ni Soriano.
Sama sa PDEA 7 wala pa usab sila maka kuhag kasayuran labot sa presensya sa ecstasy nga nangabot na sa Sugbo apan wala sila mo kompyansa sa pagduda nga naa kini sa mga high-end nga mga balay-kahilayan.
Gimandoan na ni Colonel Soriano ang iyang intelligence officer sa pagpaniid sa mga dapit nga didto ang mahitabo ang transaksiyon sa ecstasy. (AYB)