ANG Cebu City Transportation Office (CCTO) niabeso sa publiko mahitungod sa rerouting sa ipahigayon nga Solemn Procession alang sa kapistahan ni Senior Santo Nino karong Sabado, Enero 18, 2020.
Magsugod ang pagsirado sa kadalanan nga rota sa prosesyon sa alas 10 sa buntag hangtod mahuman ang kalihokan.
Ang prosesyon magsugod sa Basilica del Sto. Nino molahos sa Osmena Blvd., wala sa Colon St., motuo sa Leon Kilat St., molahos sa J. Alcantara St., tuo sa V. Rama Ave., tuo sa B. Rodriguez St., tuo sa Osmena Blvd., wala sa P. Del Rosario St., tuo sa Junquera St., wala sa Colon St., tuo sa D. Jakosalem St., wala sa Osmena Blvd., ug ang katapsan sa rota mao ang simbahan sa Sto. Nino.
Gipahibalo usab sa CCTO nga adunay ipahigayon nga clearing ug towing sa mga sakyanan ug sa ubang mobabag sa rota sa prosesyon pagahimoon sa alas 6 sa buntag hangtod sa alas 10 sa buntag sa samang adlaw.
Ang mga sakyanang pampubliko nga maapektohan sa rerouting mao ang naggikan sa Alumnos, Labangon, Guadalupe, Banawa, Capitol, Lahug, Apas, Mabolo ug Opra.
Traslacion
Pangsirad-an ang mga dalan sa Dakbayan sa Mandaue nga maagian sa Traslacion karong adlawa, Biyernes, Enero 17, 2020.
Lakip sa pangsirad-an mao ang tibuok dalan sa A.S Fortuna ug mga interseksyon nga nagkonektar kon ang mga imahe anaa na sa University of Cebu Banilad campus. (KFD)