NIMANDO na ang National Telecommunications Commission (NTC) sa Globe Telecom ug Smart Communications sa pagpawong sa ilang cell sites atol sa mga kalihukan sa Sinulog sugod Sabado sa kaadlawon, Enero 18.
Sa suwat, gibutyag niini nga sa Enero 18 atol sa seaborne-fluvial procession ipapawong na ang cellphone signal gikan sa alas 4 sa kaadlawon hangtod sa alas 10 sa buntag.
Ibalik na usab pagpawong alas 12 sa udto hangtod sa alas 8 sa gabii human sa solemn procession. Ang maapektohan nga lugar mao ang siyudad sa Mandaue, Lapu-lapu ug dakbayan sa Sugbo.
Atol sa Sinulog grand parade Enero 19, magsugod usab ang shut off alas 3 sa kaadlawon hangtod sa alas 7 sa gabii nga gibana-bana nga mahuman na usab ang parada.
Ang tibuok Siyudad sa Sugbo way signal nianang mga panahona, lakip na ang silingang dakbayan sama sa Talisay ug pipila ka bahin sa Mandaue. (AYB)