SUPERBALITA CEBU

Duha killers sa magtiayon

PATAY ang magtiayon nga puro senior citizens human gipamusil sa duha ka armadong mga tawo sulod sa ilang balay sa Purok 1, Barangay Bae, lungsod sa Sibonga sayo sa kaadlawon sa Huwebes, Enero 16, 2020.

Ang kamatayon sa magtiayon ug ang pagkamatay sa ilang anak nga lalake niadtong Disyembre 2019, diiin gipusil patay gihapon sud sa maong balay, konektado, matod pa, sa away sa pamilya.

Giila ang magtiayon nga sila si Severino Tolomia ug Anatalia Tolomia, puros 72 anyos. Mamaligyaay og mga utanon ug saging ang magtiayon sa Carbon Public Market.

Sigon ni Police Major Alfredo Kuhay, hepe sa Sibonga Police Station, nga ilang nadawat ang alarma alas 5 sa buntag human nitawag ang barangay kapitan sa Bae.

Matod pa ni Kuhay nga ang magtiayon nangatulog kauban ang ilang tulo ka mga apo.

Duha ka wa mailhi nga mga lalake nisulod sa ilang balay ug namusil.

Ang mga apo sa magtiayon nagpangidaron og 19, 12 ug 11 anyos, nakalingkawas sa pagapamusil.

Ang duha kanila nangambak sa bintana ug nidagan paingon sa ilang mga silingan aron mangayo og tabang.

Ang 11 anyos nga apo nakatago sa paglukot sa iyang kaugalingon sa banig mao ang nakasaksi sa krimen.

Iyang nakita nga gipamusil ang iyang mga apohan, ang porma ug ang pag-eskapo sa mga suspek.

Si Mark Neil Tomolia, 19, usa sa mga apo sa magtiayon, nisaysay nga ang iyang apohan nibangon human nakadungog og buto sa pusil sa pultahan sa ilang kwarto.

“Gialihan niya ang pultahan ug nagdala man tog sanggot si Lolo kay iyang proteksyonan si Lola. Nya si Lola nagkaratol-ratol naman, mao tong nakuha siya,” saysay ni Mark Niel.

Dugang niya nga wa silay nahibaw-an nga kontra ang ilang mga apohan ug wa usab siya kahibawo og kon unsa ang rason sa pagpamusil niini.

Usa sa duha ka wala nailhing lalake nisulod sa ilang kwarto, ang usa lookout sa gawas sa balay.

Onse ka mga basiyo sa .30 caliber nga armas, bolo ug sanggot narekober sa kapulisan sa crime scene.

Dugang ni Kuhay nga wa pa silay nasuta nga rason sa pagpamusil sa magtiayon.

Apan ila usab gikonsiderar nga posibleng away sa yuta ang hinungdan niini.

Usa sa mga kabanay sa magtiayon nga dili magpahingan niingon nga aduna na silay gituohan nga maoy namusil apan wa nila gisulti sanglit sila nangahadlok.

Anaa na sa kustodiya sa Department of Social Welfare and Development (DSWD) ang duha ka mga menor de edad nga apo sa magtiayon.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph