DUHA pa ka mga barangay sa siyudad sa Mati ang gideklara sa Philippine Drug Enforcement Agency nga "drug-cleared" na nga nihatud sa kinatibuk-ang ihap nga barangay ngadto sa 24.
Si Philippine Drug Enforcement Agency (PDEA)-Davao director Antonio Rivera nagdeklara sa mga barangay nga Matiao ug Sainz atol sa simpol nga seremonya niadtong Huwebes, Enero 16, 2020, sa City Hall sa Mati.
Nitambong sa maong kalihukan mao si Mayor Michelle Nakpil Rabat kinsa nagdawat sa deklarasyon ug sa samang higayon nihangyo sa PDEA nga tabangan ang local government unit sa ilang paningkamot aron tanang 26 ka barangay sa dakbayan malimpyo na sa druga.
Sa dihang nibalik og lingkod sa buhatan niadtong Hunyo 30, 2018, si Mayor Michelle nagsulti nga duna pay nahabiling lima ka mga barangay sa siyudad nga gikonsidera pang ubos pa sa inpluwensiya sa ilegal nga druga.
Human ang kapin unom ka bulan, ang administrasyon ni Mayor Michelle, uban sa pulis, barangay opisyal, ug PDEA naglimpyo sa tulo pa ka mga barangay kon diin ang mga barangay na lang nga Central ug Dahican dunay suliran sa ilegal nga druga.
"Glad to know that we accomplish in just expand of six months we are able to cleared three barangays namely Macambol, Matiao and Sainz. I would like to congratulate the barangay captain of barangay Matiao and Sainz for their efforts. Without their support we can do nothing and to the CADAC Office and PDEA for their efforts," pagdayeg ni Mayor Michelle.
Samtang mga kapitan nga si Edgar Valera sa Barangay Sainz ug Ronnie Valera sa Barangay Matiao nagpasalamat sa lokal nga kagamhanan sa Mati ug PDEA tungod sa pagtabang sa ilang mga barangay mawagtang ang druga sa hamubo lang nga panahon.
Samtang si PDEA 11 director Antonio Rivera nag-awhag sa mga lokal nga awtoridad nga palig-unon ang ilang pagbantay sa mga nataran ilabi na sa kadagatan kon diin kasagarang mga druga nga mosulod sa Davao Oriental gipaagi pinaagi sa sakayan. (PR)