NASAKMIT sa Task Force Bantay Karne, uban sa National Meat Inspection Service (NMIS) ang mga ilegal nga inihaw nga karneng baboy sa gilusad nga operasyon niadtong Enero 15, 2020.
Ang Task Force Bantay Karne pangulohan ni Dr. Marites Linsag-Erispe sa City Veterinarian Services Office, uban ni National Meat Inspection Service- Davao Region head Sofronio M. Lago, Jr. nisakmit ug nagkondena sa tulo ka mga inihaw nga baboy atol sa operasyon nga gisugdan sayo sa buntag sa maong adlaw.
Duha ka mga baboy nasakmit gikan kang Rolando Escalante sa Tagbobolo, Barangay Sainz ug ang laing usa gikan kang Melanie Valles gikan Magapo, Barangay Central.
Sila si Escalante ug Valles nakalapas sa Presidential Decree No. 7 nga nagsugo sa hapsay nga pagpamaligya og kahayopan; Republic Act 9296 o ang Meat Inspection Code of the Philippines; ug ang giamendahan nga City Ordinance No. 71, series of 2011 nga wa magbaton og meat inspection certificate.
Ang hiniusang operasyon gilusad sab subay sa NMIS Administrative Order No. 6 series of 1975. (PR)