SULOP, Davao del Sur – Usa ka inahan ang mihimugso sa iyang anak nga "baby girl" sud sa police patrol car, sayo sa buntag niadtong Miyerkules, Enero 15.
Gibutyag ni Police Staff Sergeant Jimson Gabrinez, kagahapong adlawa, Huwebes, Enero 16 nga nagtindog siya gawas sa ilang istasyon dihang miduol kaniya ang babaye aron mangayo og tabang ug wa masayod nga siya ang incoming duty police officer niadtong adlawa.
Si Gabrinez nag-ila sa babaye nga mao si Aiza Paraje, 25, residente sa Barangay Poblacion, silingang lungsod sa Malalag.
Sa way pagduha-duha, si Gabrinez daling mitawag sa drayber sa patrol car aron ihatod si Paraje sa duol nga ospital.
Apan, mga 30-metros ang gilay-on human milarga ang sakyanan padung sa paanakan, nakasinati na og tumang kasakit sa tiyan ang inahan.
Wa kapugngi sa inahan nga makautong hinungdan nga nigawas ang batang babaye sa patrol car una pa kini miabot sa birthing home.
"As Police Officer, it's part of our duty to lend humanitarian service to any citizen who needed our help, remember we are here to Serve and Protect," asoy ni Police Captain Harold S. Untalan, Sulop Municipal Police Station officer in charge.