NAPUTOL ang siyam ka sunodsunod nga kadaugan sa Los Angeles Lakers human kini buntoga sa Orlando Magic, 119-118, sa National Basketball Association (NBA).
Ang duha ka importanting layup ni Markelle Fultz sa katapusang minuto maoy nagyawe sa surprisang kadaugan sa Magic.
Gawas sa iyang 21 puntos, si Fultz mipakatapo usab og 10 ka assists ug 11 ka rebounds alang sa iyang ikaduhang triple-double performance.
Mikadlit usab og 21 puntos si Aaron Gordon lakip na ang hansak niini diin unang gipabanda ang bola sa board ug dayon layat hansak.
Gilubong og 21 puntos ang Lakers sa ikatulong quarter, apan napapas kini og gani sa panaghugpong nila ni LeBron James, Kantavious Caldwell-Pope ug Quinn Cook, ang Lakers nakasakmit pa sa labaw, 96-93.
Apan nalupig sila sa lahutay sa himatyong segundos. Si LeBron James mitapos sa duwa nga may 19 puntos ug iyang natupngan ang iyang career-high nga 19 ka assists.
Diha pa untay kahigayonan nga maka-overtime sila apan nasipyat ang iyang tres sa katapusang tres segundos.
“We’ve just got to be better,” ni James pa. “We didn’t start the game out the right way, but I’m not disappointed in anybody or anything that we did. Our bench was the reason there was a game at the end, but they came in and produced everything we needed.”
Samtang gipukan sa Portland Trail Blazers ang Houston Rockets, 117-107, ujbos sa pagpangulo nila ni Damian Lillard ug CJ McCollum.
Si Lillard mipugnit og 25 puntos, midugang og 24 si McCollum alang sa Trail Blazers kinsa nakabaton og daog pagpanghudlat sa Rockets sa uwahing bahin.
Sa dihang misuway na unta sa pagsikit ang Rockets, si Carmelo Anthony mipabuto og sunodsunod nga tres aron pagbingat og balik sa labaw sa Portland, 111-100, kuwatro minutos ang nahabilin ug gikan niadto wala na makasulbong ang Rockets.
Si Russel Westbrook naka-triple-double na sab pinaagi sa iyang 31 puntos, 12 ka assists ug 11 ka rebounds apan dili maayo ang kagabhion ni James Harden kinsa nalimitahan lang ngadto sa 13 puntos.
Sa laing duwa, gilubong sa Detroit Pistons ang Boston Celtics, 116-103, gilampornas usab sa Sixers ang Nets, 117-106.
Wa kasugakod ang San Antonio Spurs sa kainit sa Miami Heat, 100-106, ug gisungay usab sa Chicago Bulls ang Washington Wizards, 115-106.
Gilupig sa Pacers ang Timberwolvers,. 104-99, ug gipahilom sa Toronto Raptors ang Thunder, 130-121.
Yano usab nga gipukan sa Nuggets ang Hornets, 100-86, ug gitangtangan sa Dallas Mavericks og korona ang Sacramento Kings, 127-123.
Williamson malihi-an
Samtang sa laing bahin, human sa taodtaod nga pagpaabot, malihi-an na sa Zon Williamson sa NBA karong Enero 22 sa dihang ikasangka sa New Orleans Pelicans ang San Antonio Spurs.
Kini maoy gibutyag ni Pelicans general manager David Griffin.
Dul-an sa tulo ka buwan nga wa makaduwa ang no. 1 draft pick human kini operahi sa tuo nga tuhod sa wa pa sugdi ang season.
“He’s getting to the point where we actually believe he’s as ready as he thinks he is so it’s moving in the right direction,” matod ni Griffin atol sa media session.
Ingon ni Griffin nga dili una nila paduwaon og sunodsunod nga duwa si Williamson. (JBM)