KINING coverage sa Sinulog mao ang tuloma-non matag tuig sa Cebu Catholic Television Network, Inc. (CCTN) Channel 47- sud na sa 20 ka tuig. Tumong ug tuyo sa management sa CCTN mao nga aron mahatagan og kahigayu-nan ang katawhan nga makakita sa tanang mga kalihukan kalabut sa Sinulog labi na kadtong dili makasaksi sa nagkalainlaing kalihukan sa tinuig nga pagsaulog sa pista sa Senyor Santo Nino.
Nagpasalamat ang katawhan nga nausab ang hukom sa Sinulog Foundation, Inc. (SFI) pinaagi sa pahibawo ni Mayor Edgardo Labella nga mahimo na nga mokuha og video ang ubang mga media organizations ug ang si bisan kinsa sa mga kalihukan sa Sinulog sud sa Abellana grandstand. Tungod niini nagpasalamat ang CCTN sa Balaang Bata nga mapadayon ang ilang coverage sa tanang mga kalihukan sa Sinulog 2020 nga halad ra usab sa management ngadto sa Senyor Santo Niño.
•••
Hinaut pang aprobahan na sa Local Water Utilites Administation (LWUA) ang lima ka mga bag-ong sakop sa Board of Directors sa Metropolitan Cebu Water District (MCWD) aron makasugod na sila og trabaho. Gipaabut sa mga kliyente sa MCWD dili lamang mo-umento ang supply sa tubig apan naglaum usab sila nga mas mominus ang ilang bayranan sa tubig.
Ako nasayud nga anaay daghang tinubdan sa tubig nga naghuwat lang nga ugmaron sa MCWD. Naay kadagatan nga mahimong i-desalinate ug ang mga dagkong tinubdan nga wala mahinayon sa paghimog dam sa Mananga, Talisay City. Naa say daghang mga tubod sa kabukiran sa Cebu City nga wala pahimudsi sa MCWD. Anaa pa gayuy mga water pumps nga wala gamita sa Compostela tungod kay wala mosugot ang local government unit (LGU) ingon man mga water pumps nga wa na usab gamita tungod sa polusyon.
Kining mga water pumps gigastuhan sa gobiyerno og minilyon ka dolyar. Wala ba magbayad ang mga kliyente sa MCWD sa gigasto niining mga proyektong inutil? Nganong wala man gastuhi sa MCWD ang pag-rehabilitate niining maong mga pump. Karong bag-o, murag dihay duha nga ilang gi-activate human sa dugay nga panahon. Nganong mas intresado man ang taga-MCWD nga mopalit og bulk water supply gikan sa mga pribadong kompaniya nga mahal kaayo inay nga sila maoy mo-ugmad sa mga water supply? Kon tutokan kini sa bag-ong mga sakop sa board of directors, dili lamang modaghan ang supply sa tubig muminus pa ang bayranan sa ilang mga kliyente.
•••
Mipahibawo ang Cebu City Transportation Office (CCTO) nga gihatagan nila og higayon ang mga sakyanan nga maka-park sa mga dapit palibut sa Basilica Minore del Santo Niño. Hangtud lang kuno kini sa Enero 19. Ngano man diay, makahimo na sila sa pagamit sa mga pay parking zone sa kilid sa kadalanan human sa Sinulog? Dili ba anaa may kasugoan ang Department of Interior and Local Government (DILG) nga wala nay pay parking sa kadalanan? Klaruha kuno ni ninyo kay makalibug da. (mannyrabacal1144@gmail.com)