Barrita: Sinulog coverage sa una
USA ko sa unang mga reporters sa radyo nga nag-cover live sa Sinulog grand parade sa mubo pa ang rota niini, di pa daghan ang mga contigents ug di pa daghan ang mga tumatan-aw niini. Ning panahona reporter pa ko sa radio station dyRC.
Ang akong mga kauban kaniadto sila sa Mike Mahusay, Lito Quijano, Jun Arrigo, Dodong Cabangca, Ely Jopia, anhing Mar Rabaya, anhing Danny Relatado, anhing Ramonito del Rosario ug si anhing Art Maloy.
Ang amo rang Cimarron nga mobile unit ang dunay two-way radio o single side band nga magamit sa live report. Kami tawon manghangyo nga mogamit sa mga telepono sa mga tindahan nga maagian sa rota sa Sinulog. Libre sab ang plug sa ilang mga tindahan.
•••
Wa lang damha nga 40 ka tuig na diay ang Sinulog karong Dominggo. Si kanhi Cebu Customs Collector David “Boy” Odilao Jr., ang giila nga “Amahan sa Sinulog” lay maoy ang unang nag-organisar niini, maoy sagad nga interbyuhon sa radyo.
Kaniadto dali ra mahuman ang Sinulog parade. Karon magabhian na. Ang mga tawo mora naglawod ang gibag-on. Usahay ang mga reports sa newspaper moingon nga miabot og minilyon ang nitan-aw sa Sinulog, sobra pas populasyon sa tibuok Cebu.
Ang mga contingents gikan di lang sa syudad ug lalawigan sa Sugbo, kon di, hangtod sa ubang mga lalawigan. Nagkanindot, mag mabulukon, mas daghan ang mga manayaw sa mga contingents.
•••
Apan nagkaguliyang kadiyot sa coverage sa Sinulog sa dihang migawas nang report nga usa lang ka network ang mahimong mo-cover sa Sinulog. Exclusive, matod pa, kay ang kontrata sa live coverage nga balor og P800,000 nakuha sa usa ka cable TV station.
Maayo na lang nga nabantayan ni Cebu City Mayor Edgardo Labella nga miingon nga ang coverage sa Sinulog grand parade bukas alang sa tanan nga lokal ug nasyonal nga media. Way restriction, bukas bisan alang sa publiko mga mokuha og letrato ug video.
Matod pa ni Labella nanalinghug sa iyang hangyo ang Sinulog Foundation Inc. (SFI) ug si Valeriano ‘Bobit’ Avila, nga nahimong Journalist of the Year sa Rotary Club of Manila, di na mopatuman sa exclusivity contract tali sa Sinulog Foundation ug sa MyTV.