DIHA ko mobilib ni Mayor Edgardo Labella gumikan kay maminaw siya sa sentimento sa kadaghanan. Mao nay angay nga buhaton sa usa ka lider nga di ang iyang kaugalingon nga desisyon ang sundon, maminaw sab sa yango-ngo ug sentimento sa katawhan. Una, gipahunong sa mayor ang pag-clamp sa mga sakyanan sa mga manimbahay sa Basilica Minore del Santo Niño nga motambong sa matag buntag nga novenaryo sa simbahan. Puwerting daghanang bagulbol sa miaging mga adlaw kay ang mga personnel sa Cebu City Transportation Office (CCTO) nagkamulo og clamp sa mga sakyanan. Asa man intawon nila paparkingon ang mga manimbahay nga wa may parkingan ang simbahan?
Daghang mga reklamo ang naabot nako personal ug ingon man nagyawyaw sa social media. Mao tong gipakanselar sa mayor ang pag-clamp sa mga sakyanan gikan sa alas 10 sa gabii hangtod sa alas 7 sa buntag sunod adlaw. Basta tarungon lang sa pagparking ang mga sakyanan. Karon, wa nay reklamo. Mitanyag usab ang mayor sa mga manimbahay nga adto mo-parking sa duha ka malls sa South Road Properties ug North Reclamation Area ug hakuton ang mga manimbahay paingon ug pabalik sa Basilica nga libre.
Ang MyTV general manager nga atong higala ug kauban sa buhat, The Freeman columnist Bobit Avila, mopahibalo nga adunay exclusive rights ang MyTV sa coverage sa Sinulog 2020 sa grandstand. Kay matod pa ni Sir Bobit nga nagkapirmahanay sila og kontrata ni Ricky Dakay, chairman sa Sinulog Foundation Inc., alang sa maong kasabutan.
Ang My TV ang adunay katungod nga exclusive nga mo-cover sa kalihukan labi pa sa presentation sa contingents sa granstand. Kon adunay mo-cover kinahanglan nga mananghid sa MyTV o adto mokuha og footage nila ug i-credit sila. Mirebenta ang ubang television stations kay karon pa ni mahitabo. Kaniadto free for all man ang coverage.
Nagyagaw sa social media ang reaction sa ubang taga media kay bisan ang live streaming sa mga newspapers did-an naman. Aw, gipa-kanselar ni Mayor Labella ang exclusivity ug puwede nang mo-cover ang ubang media. Kana maoy mayor. Maminaw sa katawhan. (bobbygnalzaro@gmail.com)