GIPUSIL atubangan sa asawa ang 19 anyos nga bana niadtong nilabayng mga adlaw sa Sitio Dungoan, Brgy. Tignapoloan ning siyudad sa Cagayan de Oro.

Giila ang biktima nga mao si Vicente Ranile, 19, minyo, kinsa nakabsan sa kinabuhi human gipusil sa duha ka suspetsado nga mao sila si Benjamin Enlaron ug Andot (bansagon gipugngan).

Si PO1 Rosita Tabamo sa Police Station 8 (PS8) sa Lumbia nibutyag sa Sun.Star Superbalita nga pipila na ka adlaw nahitabo ang insidente apan tungod sa kahadlok ug kasubo sa asawa nalimtan niining itaho sa kapolisan ang hitabo.

Mismong si Kapitan Renato Rances sa Brgy. Tignapoloan ang nipahibalo uban sa asawang si Letecia, 18, ngadto sa kapolisan.

Nasayran nga mga alas 12:00 sa udto nahitabo ang pagpamusil sa umahan nga giatiman sa magtiayon.

Paingon nga mohatod og paniudto sa iyang bana si Letecia dihang naabtan nga gitionan og shotgun sa duha ka mga suspetsado ang iyang bana.

Gani gibadlong pa sa asawa apan deretso nga gipabuto sa duha ka suspek ang maong shotgun hinungdan nga maayong pagkaigo sa dughan nga bahin. Gitabang pa sa iyang asawa ang biktima apan paglingi niini wala na ang duha ka mga suspek ug nakasibat na.

Matud ni Tabamo nga gipahigayon na ang pagsikop sa mga suspetsadong misibat. (Stephanie V. Berganio)