GIPASAKAAN na og kaso sa usa ka pulis ang tawong iyang nakapkapan nga nagbaton og armas nga way pagtugot gikan sa Commission on Election (Comelec) didto sa lungsod sa Padada, Davao del Sur.
Ang gikasuhan giila nga si Jun Albutra, ug molupyo sa Barangay Tulogan, Padada.
Ni PO1 Randy Dagasdas, kinsa nadestino sa Davao Sur Provincial Public Safety Management Company (DSPPSMC), nga nakapkapan nila si Albutra nga nagtakin og armas dihang gihimo nila ang checkpoint.
Niadtong Martes, giduso dayon ang kasong paglapas sa Comelec Resolution 8714 kun omnibus election code human nasikop ang suspek, adlaw'ng Lunes.
Sa paghiling sa pulis niadtong higayona, usa ka kalibre 9mm Parabellum Europe Standard, nagbaton sa serial number R59307, aduna kini'y usa ka magazine diin sud ang 13 ka mga buhing bala.
Si Dagasdas nikanayon nga gitabangan niya pag-asikaso ang iyang amahan nga si Emeterio, kalabot sa gamay'ng suliran niini sa ilang basakan dihang nasiplatan ang suspek.
Apan, kay nag-inusara lamang si Dagasdas niadtong higayona milampos ang suspek sa pagsibat ngadto kaniya.
Bisan pa man niini nihimo na ang kapulisan og mga lakang aron mapadali ang pagpaguwa sa warrant of arrest batok sa suspek.
Dinhi sa Davao del Sur, kini pa lang ang ikaupat nga insidente sa pagkasikop og mga tawong naghupot og illegal nga armas subay sa uwahing rekord sa kapulisan.
Gihagit karon ni S/Supt. Ronald Dela Rosa ang tanang hepe sa matag kalungsuran nga tinud-on ang gipatumang Joint Security and Control Checkpoint (JSCC) human namatikdan sa katawhan nga tagsa na lang ang pagpahigayon niini diha sa kadalanan. (Dondon Dinoy)