Milwaukee nakaipsot

NAKALUGNOT ang hosts Milwaukee Bucks sa mga pagpanghuldat sa Boston Celtics aron iposte ang 128-123 nga kadaugan sa National Basketball Association (NBA) kagahapon.

Sa pagpangulo nila ni Giannis Antetokounmpo ug Khris Middleton, ang Bucks sayong nakapabulhot sa ilang opensa ug nakaposte na dayon kini’g 20 puntos nga labaw, 40-20, sa sayong bahin sa 2nd quarter.

Taodtaod napungan sa Bucks ang maong labaw una nakaduol pagbalik ang Celtics, 81-87, sa nahabiling 5:16 minutos sa 3rd quarter.

Hinuon human niini, ningsutoy na sab og balik ang opensa sa Bucks aron inaton og balik ang ilang labaw nga niabot na og 22 puntos, 106-84, sa nahabiling 24 ka mga minutos sa 3rd quarter.

Sa hinayhinay, ninggukod na sab ang Celtics ug ilang napahak ngadto sa upat na lang ka mga puntos ang labaw sa Bucks, 123-127, sa nahabiling 38 ka mga segundos.

Wala ra nakalahutay ang Celtics gumikan kay nahikawan na sila sa oras.

“We were up 20 twice and they came back,” matod ni Antetokounmpo, kinsa maoy kasamtangang MVP.

“... We didn’t play the best basketball and how we usually play. I was kind of upset after the game. We talked in the locker room. We talked to one another. We were up 20 and we won but we’ve got to play for 48 minutes.”

Taliwala sa ilang kadaugan, si Milwaukee Bucks coach Mike Budenholzer wala nalipay sa gipakitang duwa sa iyang mga batos.

“Coach Bud came in here and he was steaming hot. He was angry and that’s good. He doesn’t really care about this game or the next game,” pasabot ni Antetokounmpo.

“He cares about how we can get better and how can we be good for 48 minutes. That’s what our goal is.”

Hinuon sa mga kasaypanan nga nahimo sa Bucks sa season, nagpabilin silang nag-una sa overall standing dala ang 37-6 nga rekord. Naposte sab nila ang ilang ikalimang sunodsunod nga kadaugan.

Gipangulohan ni Antetokounmpo ang kadaugan pinaagi sa iyang 32 puntos ug 17 rebounds samtang nidugang og 23 puntos si Middleton.

Ang Celtics, nga nahagbong sa 27-13 nga rekord, gipangulohan ni Kemba Walker pinaagi sa iyang season-high nga 40 puntos samtang niamot og 24 puntos si Marcus Smart.

“It’s a very long season, still,” asoy ni Walker. “We got so many games to play. When you have losses like this, you just have to learn from it, and I think we will.”

Sa laing mga duwa, ningdaog ang Los Angeles Clippers batok Orlando Magic, 122-95, Denver Nuggets batok Golden State Warriors, 134-131, New Oleans Pelicans batok Utah Jazz, ug Phoenix Suns batok New York Knicks, 121-98. (AP, ESL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph