ADUNA pa siya’y sagubangunon nga away ugma sa iyang pagbalik sa octagon apan ang mixed martial arts (MMA) superstar nga si Conor McGregor nagsige na’g hisgot nga tinguha niyang mobalik og away sa boksing ug gusto niyang kontrahon si Filipino boxing icon Manny Pacquiao.
Si McGregor gikatakdang makig-away kang Donald Cerrone sa main event sa UFC 246 sa T-Mobile Arena sa Las Vegas ugma. Mao kini ang labing una niyang away sulod sa 15 ka mga buwan nga pahuway.
Unang miaway si McGregor sa usa ka boxing event niadtong Agusto, 2017diin nasugamak siya sa 10th round TKO nga kapildihan batok kang American Floyd Mayweather Jr.
Sa nagkadaiyang mga interbyu, si McGregor nipadayag nga tinguha niyang makig-away kang Pacquiao sa Allegiant Stadium sa Las Vegas, nga maoy bag-ong balwarte sa Las Vegas Raiders sa NFL.
Sa kasamtangan, ang maong stadium padayon pang gitrabaho ug giingong makapasulod kini og 60,000 ka mga tumatanb-aw.
“That’s the new football stadium, is it? I would be honored to be a part of that event,” matod ni McGregor sa interbyu sa www.boxingscene.com.
“I would love to be the first combatant to fight in that arena. What a fight that would be against Manny, right? A small, powerful southpaw. I’d have to figure out the weight and these types of things, but it’s something that interests me no doubt.”
Gipasabot ni McGregor nga lisod alang kaniya ang hingpit nga pagbiya sa MMA apan hugot ang iyang pangandoy nga makalangkat og world title sa boksing. (ESL)