SA MINGLABAY’NG katuigan, mingbida kanunay ang marathoners gikan sa Sugbo sa Milo Marathon National Finals pinangulohan ni Olympian Mary Joy Tabal, kinsa nipatigbabaw sa women’s 42K sulod na sa unom ka mga tuig.
Tinguha sa Sugbuanong marathoners nga magpadayon kining maong tradisyon sa ilang pagsalmot sa 2020 nga edisyon sa lumba nga ipahigayon ugma sa Tarlac City bisan pa’g mahikawan sila og kahigayunan nga makigduyog sa kasaulogan sa Sinulog Festival sa dakbayan sa Sugbo.
Sama sa naandan, si Tabal, 30, maoy labing paborito nga makahatag na sab og dakong dungog sa Sugbo.
Gawas kang Tabal, gilauman nga makakombati sab og insakto ang ubang elite runners sa Sugbo nga sila si Ruffa Sorongon, Lizane Abella ug Evamie Villarin sa women’s event.
Si Tabal gikan pa sa iyang silver medal finish sa 30th Southeast Asian (SEA) Games sa New Clark City sa miaging buwan.
Sa iyang bahin, si Sorongon lab-as pa sa iyang kadaugan sa Cebu Marathon niadtong Enero 12, 2020 sa Cebu Business Park diin nagsunod kaniya sila si Villarin ug Abella.
Nagkanayon si Tabal nga nakatutok siya’g insakto ning maong lumba, gani matod niya nga duha lang ka mga adlaw siya nipahuway human sa SEA Games ug mibalik dayon siya sa iyang training alang sa Milo Marathon.
Sa laing bahin, si Sorongon nakitaan og kalambuan sa iyang pagsalmot sa Milo Marathon sa nanglabay’ng katuigan.
Gikan sa 16th place sa iyang unang pagsalmot sa lumba, misaka siya sa ikasiyam dayon ikapito, ikalima hangtod nga nipatong siya sa ikaupat niadtong 2018.
Kon buot hunahunaon, kini maoy 2019 nga edisyon sa lumba gumikan kay giuswag kini og usa ka buwan gumikan sa pag-host sa nasod sa SEA Games niadtong Nobiyembre 30 hangtod Disyembre 11 sa miaging tuig.
Gilaumang mohatag og hugot nga kompetisyon sa Sugboanong marathoners sa women’s 42K mao sila si SEA Games gold medalist Christine Hallasgo ug Christabel Martes.
Sa men’s 42K, ang mga pambato sa Sugbo mao sila si Prince Joey Lee, Jonel Emia, Ruel Algufera, Don Zabala, ug 2020 Cebu Marathon champion Azlan Pagay. (RSC, ESL)