MIIWAY ang bagang panganod
Ug way dag-om nga makita
Sa naglihok nga mga mata,
Sa pagsadsad sa mga tiil,
Sa nagkibutkibot nga mga baba,
Kay ang ilang kasingkasing
Giharian sa gugma nga gitangkil
Sa nagdilaab nga pagtuo.
Kandilang wa pa kadagkuti
Among gikuptan giwarawara
Nagpanawag sa Imong Balaanong
Ngalan, kay bisan Ikaw usa ka Bata
Sa among panan-aw. Ikaw man
si Hesus nga mikunsad dinhi.
Gipadala sa Imong Amahang Diyos
Gikan sa Langit aron among ampuan
Ug dangpanan sa magul-anon
Namong mga dughan.
Batang milagruso ug gamhanan
Ning Imo karong kapistahan
Kaming tanang mga Sugbuanon
Nag-ambahan naghuwat nga
Imong hatagan sa grasya mong gasa
Kay walay makatupong sa Imong
Gahom nga Langitnon!
Pit Senyor! Viva Santo Nino!
Sa tanang panahon Ikaw
Ang kanunay ang dangpanan
Sa nagmahal Nimong katawhan!