BISAN kon halos tanan nga kalihukan sa kapistahan ni Senior Sto. Niño ug sa Sinulog anaa sa dakbayan sa Sugbo, ang kapulisan sa siyudad sa Talisay nagsugod sa Biyernes, Enero 17, mipahigayon og mga checkpoint sa boundary sa duha ka mga dakbayan.
Matud ni Police Chief Master Sergeant Meriam Roble, ang tigpamaba sa Talisay City Police Station, nga sugod pa lang sa Biyernes nihimo na sila og mga random checkpoint sa mga boundary ilabi na sa may Lantaw sa Cebu South Coastal Road (CSCR) sa Barangay Tangke.
Sa Sabado, Enero 18 ug Domingo, 19, subsob nga mga checkpoint ang himuon sujd sa 24 oras.
Kini aron pagtabang ug pagsiguro nga way makalusot nga mga kontrabando ug mga tawo nga adunay dautang’ tuyo sa kalihukan ug kang bisan kinsa.
Samtang diha sa dan N. Bacalso nga boundary, pagpatrolya ang gihimo usab sa ubang Talisay Police personnel kini lahus na ngadto sa commercial district sa syudad ang barangay Bulacao ug Tabunok.
“Gihimo ra namu ang regular nga patrolling, ang presensya sa wipers kini aside sa 24 oras nga checkpoint diha sa SRP, kay bantayan ang mga mosud ug mogawas sa Cebu City ilabi na ning Sinulog, daghan ang mga tawo,” saysay ni Roble.
Niapud-apud usab sila og mga notisya o flyers sa publiko kalabot sa mga hulagway sa mga tawo nga notadong tulisan, manyempuhay, mangingilad ug kawatan nga sagad mogara kon adunay daku nga kalihukan.
Ang uban sa mga pulis sa Talisay ang gi-augment usab sa Cebu City, hinungdan nga double alert sila sa Talisay.
Giawhag usab nila ang publiko nga manginlabot, mo-report dayon sa pulis kon adunay nakita o nasigpatang’ mga kadudahang’ butang ug mga tawo, alang sa dinaliang nga pag-aksyon sa mga pulis.
Ang Talisay moabag sa pulisan sa Sugbo sa pagmintinas sa kahusay ug kalinaw lakip sa dagan sa trapiko sa habagatan. (FMD)