SUNODSUNOD ang mga problema nga gisagubang ni Mayor Edgardo Labella ning pagpahigayon sa Sinulog 2020. Gikan sa clamping sa mga sakyanan ngadto na sa sponsorship sa Sinulog.
Una, nibati ang imahe sa iyang administrasyon tungod sa grabeng clamping sa mga sakyanan nga gi-park sa mga dapit palibot sa Basilica Minore del Santo Niño. Grabe ang kasuko sa publiko, labina sa mga manimbahay, kay di baya lalim ang gibating kahasol sa mga tag-iya nga gikan sa pagsimba, wa na makauli dayon kay kinahanglan pang i-settle ang bayranan sa pag-clamp.
Nasulbad ni human momando si Labella sa Cebu City Transportation Office (CCTO) og moratorium sa clamping ug towing sa mga sakyanan sa tibuok siyudad, labina sa mga dapit palibot sa Basilica. Gipakpakan siya sa publiko tungod sa iyang gibuhat.
Sunod niyang problema mao ang kontrata sa exclusivity sa coverage sa Sinulog grand parade nga gihatag ngadto sa MyTV. Laliman ka, bisan ordinaryong tawo di tugotan nga makakuhag footage o maka live video sa kalihukan kay ang MyTV lang ani ang naay katungod. Mao ni ang nakalatid sa kontrata tali sa MyTV ug Sinulog Foundation Inc. (SFI). Iya dayon nga gikanselar ang exclusivity sa kontrata.
Lain nga problema karon mao usab ang exclusivity sa pagpamaligya og mga pagkaon nga naa usab sa kontrata sa SFI ug San Miguel Foods Inc. nga giangal sa ubang mga kompaniya nga nagbase sa Sugbo. Niklaro ang mayor nga di kini mahimo kay kalapasan kini sa free enterprise.
Dalaygon man tuod ang gibuhat ni Labella tungod kay kahibawo siyang maminaw sa reklamo sa kinabag-an sa katawhan, makita usab nga wa siya masayod unsay gibuhat sa SFI ug Sinulog Governing Board. Gikinahanglan unta nga masayod si Labella unsa nay ilang gibuhat ug lakat sa pagpangandam sa Sinulog kay di kini gamay nga kalihukan. Leksyon kini nga kinahanglan di na masubli sunod tuig.