MAKABALIGYA sa ilang mga produkto ang bisan kinsang mga kompaniya kon nakakumpleto sa mga rekisito nga gipangayo sa Sinulog Foundation Incorporared (SFI) atol sa Sinulog.
Kini ang gipadayag ni Cebu City Mayor Edgardo Labella human iyang nasayran ug nigawas sa pamantalaan nga adunay gisudlan nga exclusive contract ang SFI ug San Miguel Foods Inc.
Gipadayag ni Labella ni Labella nga way gahom ang SFI sa pag-embargo sa mga produkto nga gi-display o gibaligya nga di iyaha sa San Miguel.
Ang mayor nihulagway nga ang gibuhat sa SFI kalapasan sa prinsipyo sa free enterprise, diin ang matag usa adunay kagawasan sa pagpamaligya basta nisunod sa mga lagda sa kagamhanan.
Gimanduan ni Labella si Police Colonel Englebert Soriano, officer-in-charge sa Cebu City Police Office, sa pagsakmit sa illegal nga mga baligya sama sa ilimnong makahubog nga nasulod sa 100-meter radius sa Sinulog grand parade route atol sa liquor ban sa Dominggo, Enero 19, 2020.
Ang mayor nakadawat og suwat gikan sa Virginia Foods Incorporated nga niapilar kang Labella nga makaapil sila og baligya sa Cebu City Sports Center (CCSC), Plaza Independencia ug Fuente Osmeña diin ipahigayon ang mga kalihukan.
Ang SMFI nibayad og P3 milyones ngadto sa SFI, diin P2,750,000 niini cash samtang ang P250,000 mga in kind.
Ang Virginia Foods Inc. nitanyag og P300,000 nga balor sa exchange deals ug marketing ngadto sa foundation.
Si Sinulog Governing Board (SGB) communications officer Angela Emphasis niingon nga ilang gipili ang tanyag sa SMFI kay sa VFI kay ang nahauna mas taas og gitanyag.
Duha ka adlaw ang nakalabay, gipakanselar usab ni Labella ang exclusive rights sa MyTV labot sa pag-broadcast sa Sinulog activity sulod sa CCSC.
Iyang giabisohan ang SFI nga di na mosulod og mga exclusive contract sama sa ilang gipangbuhat.
Matod ni Labella nga kon nahibawo pa siya, di kini niya tugotan isip mayor.
Si Elmer “Jojo” Labella, executive director sa SFI, niingon nga binuhatan kini sa marketing arm nga maoy gidestino sa SFI sa pagkuha og sponsors alang sa Sinulog 2020.