USA ka sundalo ang gipusil patay sa wala mailhing mamumuno samtang nagsakay sa iyang motorsiklo pauli na unta sa ilang pinuy-anan sa alas 12:00 sa gabii niadtong Lunes didto sa Licanan, Bunawan, siyudad sa Davao.

Ang biktima giila sa kapulisan nga mao si Cpl. Benjie Hipayan, 37, minyo, nakabase sa Camp Panacan ug nagpuyo sa Purok 6, Do¤a Andrea, Asuncion, Davao del Norte.

Base sa spot report sa Bunawan Police Station, ang biktima gikan dinhi sa siyudad sa Davao ug mopauli na unta sa ilang balay sakay sa iyang kolor pula nga Honda XR nga dunay plate number 4188-KB.

Giingon nga naglingaw-lingaw ang maong sundalo dinhi sa siyudad atol sa pagsaulog sa ika-73 nga Araw ng Dabaw apan wala niya damha nga didto lang sa Licanan kutob ang iyang kinabuhi.

Si Hipayan wala masayud nga dunay mga tawo nga nag-atang kaniya mao nga wala siya nakalikay sa kamatayon.

Ang biktima nakaangkon og daghang samad pinusilan sa iyang kalawasan mao nga wala na siya nadala sa tambalanan.

Nakuha sa kapulisan ang basiyo sa bala sa .45 kalibre nga pistola, pitaka sa biktima nga dunay mahinungdanong papeles sama sa mission order nga atua karon sa kustodiya sa Scene of the Crime Operatives (Soco).

Sa pagsuwat ning balita, gisusi na sa kapulisan ang motibo sa maong krimen aron mailhan ang mga mamumuno nga mipatay sa biktima.