ANG 30-kilometer 3rd Sikad Tuburan course magpakita sa nagkadaiyang subidahon ug tungason, lapuk, ug masapnot nga dalan, apan maanindot sab nga talan-awon.
Ang ikatulong Sikad Tuburan, nga gibutyag sa mga organizers nga mas lisud nga 'course' itandi sa nanglabay nga duha ka edisyon maoy lauman sa mga sumasalmot nga anaa sa 200 kabuok karong Marso 1.
Ang organizer Mary Ann Fuertes, kanhi Interface Development Interventions (Idis) executive director, nagyagyag niini atol sa Davao Sportswriters Association (DSA) Forum sa The Annex sa SM City Davao.
Si Fuertes, nga giubanan ni Tuburan Institute Inc.'s Carlos Neiko Villamero, nagsulti, "It's a challenging trail. More than times two ang nadungag sa course kay dati fourteen karon at least 30 kilometers na."
Dugang niya nga wala sab kaayo sila'y kausaban akron nga tuig, tungod mas nakapokus sila sa pagtigum og pundo nga igahin sa pagpromotar sa environmental conversation pinaagi sa pagbisekleta, isip alternatibo nga pamaagi sa transportasyon.
Apan gipasigarbo niya ang ilang customized trophies nga ginama sa 'recycled cycling parts' ni Kabunyan De Guia, nga gikan sab sa Barangay Tugbok Proper, Tugbok District sa Davao City asa kasamtangang nahimutang ang Tuburan Institute, Inc. Wa sab gitugot ang paggamit og plastik atol sa lumba, diin ang organizers motagana og refilling stations, diin partisipante gihangyo nga magdala og kaugalingon nilang tumblers.
Ang registration anaa sa P300 alang fun ride 7-12 anyos, 13-29 years old, 30-39 years old, 40-above ug competitive 18-29 years old, 30-39 years old ug 40-above nga kategoriya, apil na ang packed lunch, souvenir shirt ug raffle coupon.
Ang onsite registration himun sa Mintal Gym karong Marso 1 gikan 6 a.m. ngadto 8 a.m.
May medalya nga nagpaabot sa top ten finishers sa fun ride categories samtang cash prizes nga P3,000, P2,000, P1,000 ug P500 sa fourth placers sa competitive categories.
Ang annual bikefest, suma niya, nagtumong sa pagtigum og pundo alang sa operasyon sa institusyon, diin ang tunghaan may pipila lamang ka estudyante ug ang ginikanan, di halos kabayad 'in full' sa tuition sa ilang kabataan.
Sa dugang kasayuran, kontak lang sa (0905) 402-4684 o (0933) 468-1783.