BANSALAN, Davao del Sur – Gipahimangnoan sa Philippine Institute of Volcanology and Seismology (Phivolcs) ang publiko nga angayang magpakabana ug mag-amping sa kanunay aron malikay sa disgrasya panahon sa kalamidad.
Angayan sab nga mohimo og disaster preparedness ang mga lokal nga gobyerno karong mga panahona.
Gibutyag ni Phivolcs Executive Director Renato Solidum, kinsa mao sab ang undersecretary sa Department of Science and Technology (DOST) nga posibleng makamata ang "dormant" nga mga bulkan sama sa Mt. Apo tungod sa mga paglihok sa yuta.
Gumikan niini, posible nga mahimong aktibo ang Mt. Apo ug uban pa nga ania sa Mindanao.
Sa siyudad sa Davao, gimandoan ni Mayor Sara Duterte-Carpio ang Public Safety and Security Command Center (PSSC) nga mohimo og pagtuon sa mga posibleng epekto ugaling mobuto ang bulkan.
Gibutyag ni PSSC head Angel Sumagaysay nga mihimo na sila og research ug disaster preparedness aron masuta ang mga pagahimoon sa panahon sa kalamidad.
Samtang sa bulletin sa Phivolcs, usa ka magnitude 2.2 nga linog ang mitay-og mga usa ka kilometro habagatang kasadpan sa lungsod sa Bansalan diin anaa sa 31 kilometros ang gilawmon, alas otso sa buntag sa Biyernes, Enero 17.
Anaa sa lugar ang pinakaduol nga agianan sa Mt. Apo diin mga 24-kilometros ang gilay-on gikan sa sentrong bahin sa lugar.
Sa kasamtangan, daghan ang nagadayo sa mga dapit sa tiilan sa Mt. Apo sama sa Barangay Kapatagan sa siyudad sa Digos ug sa Barangay Managa, Bansalan tungod sa mga nindot nga suruyanan ug talan-awon sa kabukiran. (Orlando B. Dinoy)