USA sa akong nabantayan sa pag-exercise og kada buntag mao ang maayo nga pagkatug sa gabii. Di na ko maglisod sa pagkatug. Labina kon sayo ko makapanihapon. Kanang Dominggo nga maka-mountain bike ride ko, sayo kaayo kong magduka. Bisan mga alas 8 pa lang sa gabii, lami na kaayo iplastada sa katre.
Matod sa mga pagtuon, ang exercise sa sayo sa buntag momugna og dugang melatonin, usa ka matang sa hormone nga gipagawas sa usa ka parte sa utok. Ang melatonin nagkontrolar ni sa pagkatulog ug paghigmata. Mas daghang melatonin, mas maayo ang pagkatulog.
Mao diay nga mas maayo ang pag-exercise sa buntag kay sa hapon o gabii. Mas makatabang nimo ni sa pagpahuway og sayo. Sukad bitaw ko nag-exercise og sayo sa buntag, dali na kong magduka sa gabii. Apan depende usab ni kon unsay akong gibuhat. Pananglitan, nagkape ko nianang sayo sa gabii, makaapekto ni sa akong sleeping cycle. Kini tungod kay ang caffeine sa kape makaapekto sa sleep cycle.
Busa, ang exercise, gawas nga makatabang sa maayong pagkatulog, duna say epekto sa oag-cope sa lawas sa stress. Yes, stress. Di ba tungod sa pressure sa trabaho ug uban pa karong panahona, sayon ra kaayo nga ma-stress ang tawo? Di sama kaniadto sa mga dekada, 70, 80 ug sayo sa 90s, slow pace rang kinabuhi.
TSISMIS
Kon nakahigayon ka og apil-apil sa tsismis sa imong silingan nga sagad molanat og kapin sa usa ka oras, nganong di mo man kini i-convert og mas productive nga buhat, sama sa pag-exercise. Gawas nga makaayo sa lawas, makalikay ka pa sa posibleng kiha, labina kon ang mga libak gipaagi sa Messenger o kaha sa social media, sama sa Facebook.
Bitaw, lisod kaayo ibangon og sayo, apan kon maghuna-huna ka sa imong panglawas ug pamilya isip inspirasyon, imo ning paninguhaon nga mahimo o himuon kada adlaw. Pangutan-a ang imong kaugalingon kon nganong nagtrabaho ka og tarong. Di ba alang ni sa imong pamilya ug kaugalingon? Kon edaran ka na ug gustong maglikay sa mga tambal, pagpasingot.
BISYO
Daghan ang nagtuo nga okay ra ang magbisyo, sama sa sigarilyo ug alak basta kada adlaw lang mag-exercise. Mag-unsa man ang exercise kon naa gihapon ang bisyo? Sama sa pagpanigarilyo. Di baya matangtang ang nicotine nga mosulod sa imong lawas tungod sa pagpanabako.
Mas maayo nga ang exercise ubanan sa pag-usab sa lifestyle. Kon magsige ka og panigarilyo, hinayhinayi ni og biya hangtod nga ang imong lawas maka-adjust na. Instead nga magbisyo ka og sigarilyo, himoang bisyo ang pag-ehersisyo. Ang pag-anad ra ang gikinahanglan, ubanan sa sakripisyo alang sa imong kaugalingon ug pamilya.