SULOD sa ilang lawak nanghapnig si Nova sa iyang nadawat nga mga butang nga gipadala ni Elena. Duna say pipila ka buok para kang Celso, iyang kapikas. Pero si Nova ra ang nanghulbot tanan gikan sa Balikbayan box.
“Nasayod ka ba nga kon manghilabot kag butang nga dili para nimo, duha ka sugo sa Diyos imong gisupak?” ni Celso nga seryusong nangutana sa iyang asawa.
“Ha? Nganong nangutana ka ana? Nangawat ba ko?” ni Nova nga nahasinta.
“Ikaw ray nagsulti ana. Pero gihisgutan lang tika sa napulo ka sugo sa Diyos kun Ten Commandments,” ni Celso. Nagtinutokay sila.
Kada bulan sa Disyembre magpadala og duha ka balikbayan box gikan sa Amerika si Elena, manghod ni Nova. Ang mga karton gi-address sa balay nilang Nova kay abogado si Celso ug katahaan, nga way magbinuang sa kargamento.
Nasayo pag-abot ang mga karton. Sa Nobiyembre 15 gihatod na sa forwarder. Giteksan dayon ni Nova ang iyang mga igsuon nga sila si Hernan, Rose, ug Victor. Nilang lima ka managsuon, ikatulo si Nova ug ikaupat si Elena. Ilong tuwapos na sila. Kay si Elena may gisuwerte sa kinabuhi, di gyud niya sipyaton ang paghatag og pinaskuhan sa iyang mga igsuon. Naka-bana si Elena og Amerkano ug naa magtrabaho sa usa ka five-star hotel sa Kansas.
Gikasabutan ni Nova ug sa iyang mga igsuon nga ablihan ang mga karton sa Nobiyembre 17, adlawng Dominggo. Kinahanglan nga anaa silang tanan. Nasayod man si Celso nga kon dunay para iya, markahan man sa iyang ngan. Mitan-aw siya sa salida sa Cable TV, documentary sa National Geographic. Paglabay sa usa ka oras ug tunga nahuman ang hinablutay sa mga pinaskuhan.
“Naa kay kuan, Cels, bag o portpolyo, duha ka T-shirt, usa ka polo ug usa ka shortpants nga maong,” ni Nova nga mitudlo sa pundok sa sapot nga gihapnig ibabaw sa lamesita duol sa sopa nga gilingkuran ni Celso.
“Maayo hinuon,” ni Celso nga nagpahiyom nga mitan-aw kang Nova nga misulod sa CR.
Gihiling ni Celso ang mga butang nga giregalo ni Elena kaniya. Mga brand new. Ang purol nga maong may markang ‘Victor.’ Nagmug-ot ang nawong ni Celso. “Dili ni para nako. Nganong gikuha man ni ni Nova?” tuaw niya sa hilom. Iya kining gibalik sa nahimutangan. Paggawas ni Nova sa CR gipunit niya ang duha ka T-shirt (pula ug puti) ug polo (puti) ug gihatag kang Celso
.
“Isukod kuno ning tanan,” ni Nova samtang nagtunol sa mga sapot. Gipangsukod ni Celso. Sakto ra. Samtang siya nagsukod may gilangkat si Nova sa maong nga purol ug gitunol sa kapikas.
“Di kaha ta pangitaan sa tag-iya ini? Wa man ni ngan nako,” ni Celso.
“Naa man ngan nimo. Ako lang gilaksi,” namakak si Nova.
Gisukod ni Celso. Haom kaayo niya. Parehas man silag gidak-on ni Victor. Pero wa siya kauyon, kay di siya ganahang mosul-ob og di para niya. Gihubo niya ang purol.
“Ikaw lay sul-ob ini. Di man ko angayan ini,” ni Celso.
Dili na lang niya prangkahan si Nova nga nakakita siya ngan nga gimarka sa purol. Nagpabilin sa iyang alimpatakan ang usa ka sekreto. Kon kumprontahon niya si Nova, dili kini moangkon og sayop. Unya mangisog pag-ayo hangtod nga sul-an sa sakit. Pinangga kaayo niya ang iyang asawa.
“Unsa man nang duha ka sugo sa Diyos nga akong nasupak? Pananglitan, nanghilabot kog dili para ako?” ni Nova, nagpatuso-tusog pangutana.
“Ikawalo ug ikanapulo nga sugo,”ni Celso.
“Unsa may pulong ana?” ni Nova.
“Ikawalo: Ayaw pagpangawat. Ikanapulo: Ayaw kaibgi ang butang sa imong isigka tawo. Sa wa pa nimo kawata ang butang, imo nang giplanohan ang pagkawat niini.
Gikaibgan una nimo. Nakasupak na ka sa sugo. Sa imo na gyung pagkawat, nakasupak ka sa ikawalong sugo,” ni Celso.
“Ah, kinaraan na man na. Wa na may tawo nga mituo ana,” ni Nova.
Si Celso ang na-konsensiya sa gibuhat sa iyang kapikas. Di siya makalalis sa iyang kapikas tungod sa sakit sa kasingkasing niini. (KATAPUSAN)